Azərbaycan Respublikasında “Məişət zorakılığı ilə mübarizəyə dair 2020-2023-cü illər üçün Milli Fəaliyyət planı”nın 12.3.4 bəndinin icrası ilə bağlı Abşeron Rayon İcra Hakimiyyəti Uşaq və Ailələrə Dəstək Mərkəzinin birgə təşkilatçılığı ilə “Gender əsaslı zorakılığla mübarizə”yə dair məişət zorakılığı törətmiş şəxslər üçün psixoloji dəstək mövzusunda dəyirmi masa keçirilmişdir. Sözügedən tədbirdə Abşeron Rayon İcra Hakimiyyəti yanında Gender zorakılığı və uşaqlara qarşı zorakılıq üzrə monitorinq qrupunun üzvləri iştirak etmişdir.
Tədbirdə Abşeron Rayon İcra Hakimiyyəti yanında Gender zorakılığı və uşaqlara qarşı zorakılıq üzrə monitorinq qrupunun məsul katibi Hafiz Mikayılov məişət zorakılığı ilə mübarizə istiqamətində müdafiə mexanizminin gücləndirilməsi və təcrübi biliklərin artirilması məqsədilə İcra Hakimiyyəti və Ailə Qadın və Uşaq Problemləri üzrə Dövlət Komitəsi tərəfindən mütəmadi olaraq təlimlərin keçirildiyini qeyd edərək, gələcəkdə aşkar ediləcək zorakılıq halları ilə bağlı Qrup üzvlərinin bir-biri ilə əlaqəsinin, informasiya mübadiləsinin və müraciətlərə çevik reaksiya verilməsinin təmin olunması məqsədilə daimi əlaqədə olmaqları məqsədəmüvafiq hesab edildiyini vurğulayıb. Eyni zamanda məişət zorakılığı törətmiş şəxslərin psixoloji reabilitasiyadan keçmələri üçün müxtəlif proqramlardan istifadə olunmasının vacibliyini qeyd etmişdir.
Dəyirmi masa diskusiya formatında davam etdirilib və qrup üzvlərinin rəy və təklifləri dinlənilib.
