Abşeronda Çernobıl faciəsinin 29-ci ildönümünə həsr olunmuş tədbir keçirilib (Video)

25 aprel 2015-cü il tarixdə Abşeron rayonunda Çernobıl faciəsinin 29-ci ildönümünə həsr olunmuş tədbir keçirildi. Tədbir Çernobıl faciəsi qurbanlarının əziz xatirəsinin bir dəqiqəlik sükutla yad edilməsi ilə başlandı.

Görüşdə çıxış edən Abşeron Rayon İcra Hakimiyyətinin ictimai siyasi və humanitar məsələlər şöbəsinin baş məsləhətçisi Vüqar Bəşirov bildiridi ki, bu dəhşətli qəza bütün dünyada əks-səda doğurub. "Hadisə nəticəsində 7 min insan ölüb, 25 min insan güclü radiasiyaya məruz qalaraq ömürlük şikəst olub. 1986-cı ildə keçmiş SSRİ-nin digər respublikalarının nümayəndələri ilə birlikdə Azərbaycandan da 7 mindən çox insan bu qəzanın aradan qaldırılması üçün Çernobıla yola düşüb. Təhlükəli və ağır şəraitdə işləmək iştirakçıların əksəriyyətinin səhhətinə ciddi təsir göstərib. Onların bir çoxu normadan artıq şüalanmaya məruz qalıb. Hadisədən artıq 29 il keçməsinə baxmayaraq, bir çox iştirakçılar bu gün də əziyyət çəkirlər". Rayon ərazisində bu faciədən əlil və vəfat etmiş şəxslərin ailə üzvlərinin sayı 80 nəfər təşkil edir
Çernobıl Əlilləri Cəmiyyətinin Abşeron rayon filialının sədri Rövşən Qədəşov da öz çıxışında qeyd etdi ki, ümummilli lider Heydər Əliyev ikinci dəfə hakimiyyətə qayıtdıqdan az sonra bu qəzadan zərər çəkmiş vətəndaşların statusu və sosial müdafiəsi haqqında xüsusi sərəncam imzaladı.
Tədbirdə qeyd olundu ki, Abşeron rayonunda yaşayan, Çernobıl əlilləri dövlət tərəfindən müəyyən edilmiş təqaüd, müavinətlər və müraciət etdikləri zaman sanator müalicə ilə təmin olunurlar.
Ölkə başçısı cənab İlham Əliyevin sərəncamı ilə mütəmadi olaraq müxtəlif kateqoriyalardan olan əlillərin müavinətləri artırılır və onlar daim diqqət mərkəzində saxlanılır.
Heydər Əliyev Fondunun rəhbəri, millət vəkili Mehriban xanım Əliyevanın səyləri nəticəsində bu gün ölkəmizdə əlillərin həyat tərzi yaxşılaşdırılmış və onlar üçün hər cür şərait yaradılmışdır.
Tədbirin sonunda əlillərə rayon icra hakimiyyəti tərəfindən maddi yardım göstərildi.