Bu gün Yeni Azərbaycan Partiyasının (YAP) yaradılmasının 25-ci ildönümü ilə əlaqədar hazırlanmış tədbirlər planına uyğun olaraq YAP Abşeron rayon təşkilatı və Abşeron rayon Gənclər və İdman İdarəsi ilə birlikdə keçirilən şahmat turnirinin qalibləri məlum olub.
Tədbirdən əvvəl YAP Abşeron rayon təşkilatının sədri Bilman Vəliyev və Abşeron rayon Gənclər və İdman İdarəsinin rəisi Əsgər Əmirəliyev çıxış edərək, YAP-ın ölkəmizin həyatında oynadığı roldan danışıblar. Qeyd edilib ki, əsası 1992-ci ilin noyabrında Ulu öndər Heydər Əliyev tərəfindən qoyulan Yeni Azərbaycan Partiyası bu gün ölkənin aparıcı siyasi qüvvəsi kimi dünyanın nüfuzlu partiyalarından birinə çevrilib. 700 mindən çox üzvü olan YAP ötən 25 ildə çətin və şərəfli yol keçib.
Sonra Azərbaycanda şahmatın zəngin inkişaf tarixi barədə danışan natiqlər ölkəmizdə böyük şahmatçıların yetişdiyini bildirərək, qeyd ediblər ki, şahmatın sürətlə inkişaf etməsi, şahmatçılarımızın beynəlxalq səviyyədə uğurlarının artması Azərbaycan xalqının Ümummilli lideri Heydər Əliyevin ötən əsrin 70-ci illərində ölkəmizə rəhbərlik etməyə başlamasından sonra geniş vüsət alıb.
Prezident İlham Əliyevin də şahmatın inkişafına böyük diqqət yetirdiyini nəzərə çatdıran natiqlər dövlət başçısının bu məqsədlə respublikamızda şahmatın inkişaf etdirilməsi haqqında sərəncamlar imzaladığını, bütün bunların Azərbaycan şahmatçılarının beynəlxalq yarışlarda yeni qələbələr qazanmalarına zəmin yaratdığını vurğulayıblar. Şahmatın maddi-texniki bazasının gücləndirilməsi, şahmatçılara göstərilən dövlət qayğısının nəticəsidir ki, şahmatçılarımızın beynəlxalq yarışlarda qazandıqları nailiyyətlərin sayı gündən-günə çoxalmaqdadır.
Turnirin yekununda qaliblərə diplomlar təqdim olunub.