Xırdalan şəhərində yerləşən Şahmat Məktəbində ümummilli lider Heydər Əliyevin anadan olmasının 95-ci ildönümünə həsr olunmuş yeniyetmələr arasında şahmat üzrə daxili təsnifat turniri keçirilib. Yarışın açılış mərasimlərində çıxış edən Abşeron rayon Gənclər və İdman idarəsinin rəisi Əsgər Əmirəliyev Azərbaycanda müasir müstəqil, demokratik dövlətin qurulmasında və inkişafında ümummilli lider Heydər Əliyevin əvəzsiz xidmətlərindən danışıb. Bildirib ki, müstəqil Azərbaycanın uğurları ulu öndər Heydər Əliyevin adı ilə bağlıdır. Ümummilli Liderin siyasi kursu ölkəmizdə əmin-amanlığı, dinamik inkişafı təmin edib.
Qeyd edilib ki, ümummilli lider Heydər Əliyevin siyasi kursunu bu gün uğurla davam etdirən Yeni Azərbaycan Partiyasının sədri, Prezident İlham Əliyevin əsas məqsədi ölkəmizdə intellektual və kreativ gənclər mühiti formalaşdırmaqdır. İntellektual yarışların əsas məqsədi isə dövlətimizin gənclər siyasətinə dəstək vermək və gənc intellektləri üzə çıxarmaqdır.
Çıxışlardan sonra yarış başlanıb.
Abşeron rayon Gənclər və İdman idarəsinin təşkil etdiyi turnirdə 70-dən çox şahmatçı qüvvəsini sınayıb.
Turnir 3 qrupda İsveçrə sistemi ilə 9 turdan ibarət olaraq keçirilib.
Yarışda zəka sahibləri bütün dərəcələr üzrə mübarizə aparıblar .Oğlanlar və qızlar arasında keçirilən bu yarışda turnirin nəticələrinə əsasən qalib gələn şahmatçılar kubok, medal, diplom və qiymətli hədiyyələrlə mükafatlandırılıblar. Bundan başqa, turnirdə qalib olanlara idman dərəcələri verilib.
Şamo Əliyev
