“Qarabağ qaziləri” ambutant futbol federasiyasının “Abşeron” və “Xırdalan” komandaları arasında yoldaşlıq paraolimpiya yarışı keçirilib.

Abşeron və Nərimanov rayon İcra Hakimiyyətinin təşkilati dəstəyi ilə “ABU Arena” idman kompleksində Dövlət Müstəqilliyi Gününə həsr olunan , “Həmvətənlərə dəstək” İctimai Birliyinin təşkilat komutəsi tərəfindən Azərbaycanda ilk dəfə olaraq, yaradılan fiziki cəhətdən məhdud Horadiz əməliyyatı qəhramanlarından və Aprel döyüşləri iştirakçılarından ibarət “Qarabağ qaziləri” ambutant futbol federasiyasının “Abşeron” və “Xırdalan” komandaları arasında yoldaşlıq paraolimpiya yarışı keçirilib.

Tədbirdə Abşeron rayon İcra Hakimiyyəti başçısının müavini Fuad Cəbrayılov, Millət Vəkili Qənirə Paşayeva , Nərimanov Rayon İcra Hakimiyyətinin başçısının müavinləri İlqar Mirzəyev və Rəşid Ağayev, “Həmvətənlərə dəstək” İctimai Birliyinin sədri Rövşən Quliyev, Təşkilat komutəsinin sədri Elmar Hüseynov, AFFA-nın əməkdaşları, Azərbaycan Respublikasının Milli qəhrəmanları, Qarabağ müharibəsi veteranları, KİV nümayəndələri və rayon ictimaiyyəti iştirak edib.

Yarışın rəsmi hissəsi başlamamışdan öncə Ümummilli lider Heydər Əliyevin və xalqımızın müstəqilliyi, azadlığı uğrunda qəhrəmancasına döyüşmüş şəhidlərimizin ruhu bir dəqiqəlik sükutla yad edilib. Ardınca Azərbaycan respublikasının dövlət himni səsləndirilib.

Azərbaycan torpaqlarının 20 faizinin erməni qəsibkarları tərəfindən işğal olunduğunu və müharibə nəticəsində bir çox soydaşımızın öz həyatlarını və sağlamlıqlarını itirdiklərini qeyd edən Abşeron rayon İcra Hakimiyyəti başçısının müavini Fuad Cəbrayılov vurğulayıb ki, Azərbaycan höküməti hər zaman Qarabağ şəhidlərinin ailələrinə və qazilərə böyük diqqət və qayğı göstərmişdir: “Onların sosial problemlərinin həllinə çalışmış, sağlamlığını itirmiş müharibə əlillərinin cəmiyyətə inteqrasiyası istiqamətində əməli addımlar atmışdır. İnanıram ki, bu yarış da müharibə əlillərinin cəmiyyətdə rolunun daha da artmasına, onların asudə vaxtlarının səmərəli keçirməsinə, idmanla daha yaxından məşğul olmasına öz tövhəsini verəcəkdir.

Sonra Nərimanov Rayon İcra Hakimiyyətinin başçısının müavinləri İlqar Mirzəyev və Rəşid Ağayev, “Həmvətənlərə dəstək” İctimai Birliyinin sədri Rövşən Quliyev,
Təşkilat komutəsinin sədri Elmar Hüseynov, AFFA-nın əməkdaşları çıxış edərək idmançılara uğurlar arzulayıblar Daha sonra yarışa start verilib. Komandalar hər biri 20 dəqiqədən ibarət iki hissədə mübarizə aparıb.

Yarışın sonunda Təşkilat komutəsi tərəfindən qaliblər mükafatlandırılıb.

Şamo Əliyev