Abşeron rayonunda yeniyetmələr arasında basketbol üzrə keçirilən rayon birinciliyinin qalibləri məlum olub. Rayon Gənclər və İdman İdarəsinin təşkilatçılığı ilə reallaşan yarış 10 gün davam edib.
Masazır kənd 4 saylı orta məktəbin idman zalında 480 yeniyetmə basketbolçu 40 komanda tərkibində mübarizə aparıb.
Final görüşündən əvvəl çıxış edən Abşeron rayon Gənclər və İdman İdarəsinin rəisi Əsgər Əmirəliyev bildirib ki, yarışların təşkilində məqsəd rayonda basketbol idman növünün inkişaf etdirilməsi, yeniyetmələrin bu idman növünə maraqlarının artırılması və asudə vaxtlarının səmərəli təşkili, həmçinin basketbol oyunu üzrə rayonun ən güclülərinin müəyyənləşdirilməsidir.
Birinciliyin nəticələrinə görə, I yeri Masazır 4 saylı tam orta məktəbin komandası, II yeri Ceyranbatan 1 saylı məktəbinin komandası, III yeri Mehdiabad 4 saylı tam orta məktəbin komandası tutub.
Qalib komandalar müvafiq dərəcəli diplom və medallarla təltif olunublar.
