Bu gün Milli Paralimpiya Komitəsində (MPK) Yaponiyanın Azərbaycandakı səfirliyinin ikinci katibi, konsulluq və təhlükəsizlik şöbəsinin rəhbəri Daiji Aşizuka ilə görüş olub. Görüşdə MPK prezidenti İlqar Rəhimov, birinci vitse-prezident Natiq Qasımov, vitse-prezident və ikiqat paralimpiya çempionu İlham Zəkiyev, komitənin baş katibi Kamal Məmmədov iştirak ediblər.
MPK prezidenti İlqar Rəhimov qonağa komitə haqqında məlumat verib. O qeyd edib ki, 1996-cı ildə iki idmançı ilə başlanılan Azərbaycan Paralimpiya Hərəkatına bu gün minlərlə idmançı qoşulub. İdmançılarımız bu günə qədər 6 paralimpiya oyunlarında iştirak edib, onlarla medal qazanıblar.
Komitə sədri bildirib ki, bu gün 14 idman növü üzrə paraolimpiyaçılarımız beynəlxalq yarışlara qatılırlar. Bu il Azərbaycan üçün ənənəvi olmayan qış idman növü üzrə də idmançılarımız beynəlxalq yarışa qatılaraq medallar qazanıblar.
İlqar Rəhimov qeyd edib ki, Azərbaycan Milli Paralimpiya Komitəsi ilə Yaponiyanın ölkəmizdəki səfirliyi arasında əməkdaşlıq ölkəmizdə "Tokio 2020" XVI Yay Paralimpiya Oyunlarının ölkəmizdə təbliği baxımından da önəm kəsb edir.
Yaponiyanın Azərbaycandakı səfirliyinin ikinci katibi, konsulluq və təhlükəsizlik şöbəsinin rəhbəri Daiji Aşizuka növbəti yay paralimpiya oyunlarının Yaponiyada keçiriləcəyini qeyd edərək, öz növbəsində Azərbaycan Paralimpiya Komitəsi ilə əməkdaşlığa maraqlı olduqlarını bildirib. Əməkdaşlığı daha da inkişafetdirmək üçün bu cür görüşlərin mütəmadi xarakter almasının vacibliyini vurğulayıb.
