Abşeron rayonunun Saray qəsəbəsində yeni idman klubunun açılışı olub. Tədbirdə Abşeron Rayon İcra Hakimiyyəti əməkdaşı Hafiz Mikayılov, Abşeron rayon Gənclər və idman idarəsinin rəsi Əsgər Əmirəliyev, Saray bələdiyyəsinin sədri Natiq Tahirov, rayon ictimaiyyətinin və idman təşkilatlarının nümayəndələri iştirak ediblər.
Mərasimdə çıxış edən Abşeron Gİİ-nin rəisi Əsgər Əmirəliyev qeyd edib ki, respublikanın bütün bölgələrində olduğu kimi, Abşeron rayonunda dövlət gənclər siyasətinin həyata keçirilməsi, idmanın kütləviliyinin təmin edilməsi sahəsində ciddi iş aparılması sayəsində son 6 ayı ərzində rayonun gəncləri 21 beynəlxalq və 36 respublika idman yarışlarında iştirak etmiş, gənclərimiz İran, Gürcüstan, Ukraynada keçirilən beynəlxalq idman yarışlarında 98 medal, o cümlədən 40 qızıl medal qazanmışlar.
İcra rəsmisi Hafiz Mikayılov çıxışında qeyd edib ki, ölkəmizdə uğurla həyata keçirilən idman siyasəti gənc nəslin hərtərəfli inkişafına, sağlamlığının möhkəmləndirilməsinə, əməyə və vətənin müdafiəsinə hazırlanmasına, həmçinin, asudə vaxtlarının səmərəli təşkilinə yönəlib: " Abşeron RİH-nin başçısı İradə Gülməmmədovanın diqqət və qayğısı sayəsində Saray qəsəbəsində yeni idman klubunun açılması burada böyüyən uşaqların, yeniyetmələrin fiziki və mənəvi tərbiyəsində mühüm rol oynayacaq".
Daha sonra çıxış edənlər ölkəmizdə idmanın inkişafından, əldə olunmuş uğurlardan danışıblar.
Bütün zəruri avadanlıq və məşq şəraiti ilə təchiz edilmiş idman klubunda cüdo üzrə bölmələ fəaliyyət göstərəcək. Burada hələlik 3 məşqçi-müəllim çalışacaq. Klubda eyni vaxtda 50 nəfərin məşq etməsi mümkündür. Artıq bölmələrə yazılmaq üçün 50 nəfərdən çox yeniyetmə və gənc müraciət edib.
Məlumat üçüb bildirək ki, yeni yaradılan klubun rəhbəri Saray qəsəbəsinin sakini Zaur İsgəndərovdur.
Şamo Əliyev
