Azərbaycan Tibb Universiteti yataqxanada baş verən yanğınla bağlı məlumat yayıb.
Azərbaycan Tibb Universitetinin mətbuat katibi Günel Aslanova APA-ya bildirib ki, bu gün saat 9:55 radələrində Azərbaycan Tibb Universitetinin 5 saylı yataqxanasında yanğın baş verib. Hadisə xarici tələbələrin yaşadığı yataqxananın 404-cü otağında başlayıb. Hələlik yanğının səbəbi dəqiqləşdirilməyib. Hadisənin elektrik xətlərində qısaqapanma nəticəsində yarandığı güman edilir.
Yanğın zamanı otaqda heç kim olmayıb. Buna görə də hadisə nəticəsində heç kim ciddi xəsarət almayıb. Yalnız yataqxanada olan iki əcnəbi tələbə tüstüdən yüngül zəhərlənib. Halları pisləşən tələbələrə ilkin tibbi yardım göstəriləndən sonra onların vəziyyəti sabitləşib.
Yağın Fövqəladə Hallar Nazirliyinin Dövlət Yanğından Mühafizə Xidməti tərəfindən qısa müddətdə söndürülüb.
Azərbaycan Tibb Universitetinin rektoru Əhliman Əmiraslanov yanğın yerində olub, durumla tanış olub. Hadisənin səbəbləri araşdırılır.
--------
12:08
Fövqəladə Hallar Nazirliyi Tibb Universitetinin yataqxanasında baş verən yanğınla bağlı məlumat yayıb.
APA-nın nazirliyin saytına istinadən verdiyi məlumata görə, Bakı şəhəri, Nəsimi rayonunda səkkizmərtəbəli binanın 4-cü mərtəbəsində ümumi sahəsi 17 kv.m olan 1 otağının yanar konstruksiyaları 15 kv.m sahədə yanıb. Yanğının kəşfiyyatı zamanı otaqda olan 2 nəfər tüstüdən zəhərlənmiş halda yanğınsöndürənlər tərəfindən xilas olunaraq Təcili Tibbi Yardım Xidmətinə təhvil verilib.
Binanın 3-cü, 4-cü və 5-ci mərtəbələrindən 20 nəfər təxliyyə olunub. Otağın qalan hissəsi və qonşu otaqlar yanğından mühafizə olunub və yanğın saat 10:18-də yanğınsöndürənlər tərəfindən söndürülüb.
---------
10:56
Bakıda yataqxanada baş vermiş yanğında xəsarət alanlar var. Bakı şəhər Təcili və Təxirəsalınmaz Yardım Stansiyasından Milli.Az-a bildirildi ki, hadisə yerinə təcili yardım briqadaları cəlb olunub.
İki qadın xəsarət alıb. Onlardan biri xəstəxanaya yerləşdirilib, biri isə ilkin tibbi yardımdan sonra buraxılıb.
--------
10:30
əraziyə 5 yanğınsöndürən maşın cəlb olunub. Yanğın artıq söndürülüb.
--------
10:24
yanğın zamanı türstüdən boğulanlar var. Hazıra FHN əməkdaşları bina sakinlərini təxliyyə ediblər. Zərərçəkən 3 nəfərə ilkin yardım göstərilir.
Hadisə yerində təcili tibbi yadım briqadası işləyir.
Qeyd edək ki, yanğının baş verdiyi binanın sakinləri, əsasən, Türkiyədən olan tələbələrdir. Elə hadisə nəticəsində zərərçəkənlər də türk tələbələrdir.
--------
10:15
Bakı şəhərində binada güclü yanğın başlayıb. Tələbə Qəbulu üzrə Dövlət Komissiyasının yaxınlığında, Səməd Vurğun 173 ünvanında yerləşən Tibb Universitetinin 5 saylı yataqxanası yanır. Hadisə şahidlərinin verdiyi məlumata görə, yanğın hazırda davam edir.
Fövqəladə Hallar Nazirliyinin Yanğından Mühafizə Xidmətindən bildirildi ki, hazırda yanğınsönürmə biriqadaları hadisə yerində işləyir.