Bu gün dünyasını dəyişmiş Azərbaycanın əməkdar artisti, müğənni Məhəbbət Kazımov sabah torpağa tapşırılacaq. Bunu Absheronxeber.az saitinə açıqlamasında mərhumun yaxınları deyib.
Onların sözlərinə görə, “Vida mərasimindən sonra mərhum Xırdalandakı qəbiristanlıqda dəfn olunacaq”.
M.Kazımov bu gün səhər saatlarında dünyasını dəyişib. Yardım stansiyasından verilən məlumata görə, təcili yardım həkimləri onun yaşadığı ünvana yetişsə də, mügənninin həyatını xilas etmək mümkün olmayıb. M.Kazımov saat 11:03-də dünyasını dəyişib.
Müğəninin təzyiq və şəkər xəstəliyindən əziyyət çəkdiyi bilirilib.
Qeyd edək ki, 1953-cü il iyul ayının 2-də Laçın rayonunun Çorman kəndində anadan olub. Ailədə səkkiz bacı, dörd qardaş olublar. Atası Allahverdi təsərrüffatla məşğul olub. Anası Südabə isə evdar xanım olub. Məhəbbət Kazımov ilk təhsilini Şamkənd kənd orta məktəbində alıbdır. Kiçik yaşlarından istedadına görə digər bacı-qardaşlarından seçilmişdir. Musiqi təhsili alması üçün qohum-əqrabanın təkidi ilə 1974-cü ildə Bakı şəhərinə getmişdir. Asəf Zeynallı adına musiqi texnikumuna qəbul olunmuşdur. İlk muğam dərslərini Nəriman Əliyevdən almış, sonradan Ağaxan Abdullayevin sinifində oxuyub.
1976-cı ildən professional səhnədə çıxış edir. "Dan Ulduzu" ansamblının solisti olmuşdur. Azərbaycanın bir çox konsert salonlarında öz tamaşaçılarına solo konsertlər vermişdir. Bir çox xarici ölkələrdə, Türkiyədə, Rusiyada, İranda, Çexoslovakiyada və.s ölkələrdə qastrol səfərlərində olub. Məhəbbət Kazımov əsasən Azərbaycan milli musiqisi janrında, bir çox tanınmış mahnı və muğamlar oxuyubdur. Ən çox sevilən mahnılarından biri də "Laçınım" mahnısıdır. 14 sentyabr 2012-cin ildə Azərbaycan Respublikasının "Əməkdar artist" fəxri adına layiq görülüb.
Məhəbbət Kazımov "Laçın" instrumental ansamblının rəhbəri olub. 1990-cı ildə ailə həyatı qurub, üç övlad atasıdır.
