Dekabrın 26-da Xırdalan şəhər 17 saylı körpələr evi-uşaq bağçasında Dünya Azərbaycanlılarının Həmrəylik Günü və Yeni il bayramı təntənə ilə qeyd olunub. Əvvəlcə tədbirin aparıcısı Sevinc Seyfullayeva qonaqları salamlayaraq onları Həmrəylik Günü və Yeni il münasibətilə təbrik edib.
Bayram şənliyində çıxış edən bağçanın müdiri Könül İbrahimova tədbir iştirakçılarını Dünya Azərbaycanlılarının Həmrəylik Günü və Yeni ilin gəlişi münasibətilə təbrik edərək, əsası ümummilli liderimiz Heydər Əliyev tərəfindən qoyulmuş və bu gün Prezident İlham Əliyev tərəfindən davam etdirilən bu şərəfli ənənənin gündən-günə daha geniş vüsət aldığını bildirib.
K.İbrahimova vurğulayıb ki, 1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya Azərbaycanlılarının birliyini yaratmağın əhəmiyyətini nəzərə alaraq, dekabrın 31-ni Dünya Azərbaycanlılarının Həmrəyliyi Günü elan etmiş və həmin gündən bu əlamətdar tarixi bütün Azərbaycanlılar rəsmi bayram günü kimi qeyd edirlər Ulu öndər Heydər Əliyevin "Mən fəxr edirəm ki, Azərbaycanlıyam" ifadəsindən sonra dünyanın hansı ölkəsində yaşamasından asılı olmayaraq bütün azərbaycanlıların bu millətin nümayəndəsi olmalarını daha böyük iftixar və qürur hissi ilə bəyan etdiklərini qeyd etmişdir.Məhz ulu öndər Heydər Əliyevin gərgin əməyi sayəsində bu gün dünyada "Azərbaycan" və "azərbaycanlı" kəlməsinin dəyəri və mahiyyəti daha da artmışdır.
Balacaları bayram münasibətilə təbrik edən Abşeron RİH-in əməkdaşı Samirə İsmayılzadə bildirib ki, 31 dekabr bütün dünya azərbaycanlılarını birlik və həmrəyliyə səsləyən əsl ümumxalq bayramıdır. Artıq dünya azərbaycanlıları yaşadıqları ölkələrin ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verirlər.
S.İsmayılzadə dünya azərbaycanlılarının həmrəyliyinin təmin olunmasında ümummilli lider Heydər Əliyevin misilsiz xidmətlərindən danışıb. O deyib ki, bu günün böyük təntənə ilə qeyd edilməsi dünyada yaşayan bütün soydaşlarımız üçün mənəvi ehtiyaca çevrilib.
Şaxta baba və Qar qız maraqlı səhnəciklərlə, oyunlarla uşaqları şənləndiriblər. Rəngarəng kompozisiya ilə davam edən bayram tədbirində uşaqlar şeirlər söyləyib, şən mahnılar və rəqslər ifa ediblər.
Şənlik xoş əhval-ruhiyyə və əsl bayram ovqatı yaradıb, balacalara əyləncəli anlar yaşadıb.
