Bakı Ali Neft Məktəbinin (BANM) rektoru Elmar Qasımov Almaniyanın məşhur “G.U.N.T” şirkətinin satış və biznesin inkişafı üzrə direktoru Heiko Lentfer ilə görüşüb. Görüşdə, həmçinin “Caspian Lab” şirkətinin təchizat meneceri Səfa Hacıyev və BANM-in məsul əməkdaşları iştirak ediblər.
BANM-dən bildirilib ki, görüşdə Elmar Qasımov G.U.N.T şirkəti ilə əməkdaşlıqdan razı qaldığını və təchiz edilmiş laboratoriyaların tələbələrin yüksəkixtisaslı gənc mütəxəssis kimi yetişmələrində əvəzsiz rolu olduğunu deyib.
Heiko Lentfer isə qeyd edib ki, BANM “G.U.N.T” şirkətinin Qafqaz regionu üzrə ən böyük tərəfdaşıdır. O, şirkətin ali məktəblə əməkdaşlığa böyük önəm vediyini vurğulayıb.
Tərəflər arasında aparılan müzakirələr zamanı əməkdaşlığın ehtiyac duyulan istiqamətləri müzakirə edilib. Müzakirələr zamanı BANM-in laboratoriyalarının istifadəsi və saxlanılması üzrə məsul əməkdaşlarına və müəllimlərinə “G.U.N.T” şirkəti tərəfindən təlimlərin keçirilməsi, ali məktəbin gələcəkdə tədqiqat laboratoriyaları ilə təchiz olunması və digər məsələlərə toxunulub, müəyyən razılıqlar əldə edilib.
Qeyd edək ki, BANM müxtəlif texnoloji avadanlıqların təchizatı üzrə ixtisaslaşan məşhur “G.U.N.T” şirkəti ilə 2011-ci ildən əməkdaşlığa başlayıb və bu müddət ərzində böyük işlər görülüb. Bakı Ali Neft Məktəbinin kampusu “G.U.N.T” şirkətinin tədris labaratoriyaları ilə ən yüksək səviyyədə təchiz olunub.