Martın 30-da Xırdalan şəhər Mədəniyyət evində 31 mart azərbaycanlıların soyqırımının 100-cü ildönümü ilə əlaqədar konfrans keçirilib. Abşeron Rayon Təhsil Şöbəsinin təşkilatçılığı ilə keçirilən konfransda “Xocalı Soyqırımını Tanıtma” İctimai Birliyinin, Cəbrayıl rayon Tatar kənd tam orta məktəbinin, Xocalı rayon 2 nömrəli tam orta məktəbinin əməkdaşları, rayonun təhsil işçıləri və şagirdlər iştirak ediblər.
Konfrans Dövlət himninin səsləndirilməsi ilə açıq elan olunub. Soyqırımı qurbanlarının xatirəsi bir dəqiqəlik sükutla yad edilib. Daha sonra konfrans iştirakçılarına 1918-ci ildə ermənilər tərəfindən törədilmiş müsəlman qırğınlarının mahiyyəti, miqyası və nəticələrindən bəhs edən sənədli filmi nümayiş olunub.
Təhsil şöbəsini müdiri Nazilə Məmmədova çıxış edərək azərbaycanlılara qarşı törədilmiş bu soyqırımı tarixin qanlı səhifələrindən biri olduöunu qeyd edib. Ermənilərin azərbaycanlılara qarşı zaman-zaman törətdikləri soyqırımı ilə əlaqədar ümummilli lider Heydər Əliyevin 1998-ci il martın 26-da imzaladığı Fərmanla martın 31-nin Azərbaycanlıların Soyqırımı Günü elan edildiyi, Prezident İlham Əliyevin 2009-cu il 30 dekabr tarixli “Quba şəhərində Soyqırımı Memorial Kompleksinin yaradılması haqqında” Sərəncamının Azərbaycan həqiqətlərinin dünya ictimaiyyətinə çatdırılması istiqamətində atılan mühüm addım olduğu tədbir iştirakçılarının diqqətinə çatdırıb.
Konfransda çıxış edənlər təcavüzkar erməni millətçilərinin xalqımıza qarşı iki yüz ilə yaxın bir dövrdə həyata keçirdikləri soyqırımı siyasətindən, onun dəhşətli nəticələrindən ətraflı söhbət açıblar. Bildirilib ki, xalqımıza qarşı soyqırımı siyasəti müxtəlif dövrlərdə müxtəlif forma və üsullarla, kütləvi qırğınlarla, hərbi əməliyyatlarla həyata keçirilib.
