Mayın 1-də Xırdalan Şəhər 2 nömrəli tam orta məktəbdə Mülki Müdafiə gününə həsr olunmuş tədbir keçirilib.
Tədbirdə məktəbin müəllim-şagird kollektivi ilə yanaşı məktəbin direktoru Ədalət Camalova da iştirak edib.
Öncə iştirakçılar mülki müdafiə gününə həsr olunmuş "açıq dərs"lərdə olublar və şagirdlər zəlzələlər, torpaq sürüşmələri, qaz partlamaları, vulkanlar, yanğınlar və s. mövzularda qısa məlumat veriblər.
Sonra məktəbin həyətində süni yanğın hadisəsi təşkil olunub və həyəcan siqnalı verilib. Növbətçi müəllimlərin köməyi ilə məktəbin şagirdləri dörd dəqiqə ərzində binadan təxliyə olunub. Təxliyə olunan andan şərti xilasetmə əməliyyatına başlanılıb. Əvvəlcə “112” qaynar telefon xəttinə məlumat verilib.. Növbətçi müəllimlərin köməyi ilə şagirdlər məktəbin həyətinə köçürülüb. Post, manqalar və siniflər öz yerini tutub. Süni yaradılmış yanğın barədə məlumatlandırılan dəstənin üzvləri əlehqazlarla və yanğınsöndürmə vasitələri ilə dərhal hadisə yerinə gələrək, yanğını sondürüb, "zərərçəkən"ləri tibb bacılarına təhvil veriblər. Hərbi rəhbər raport verib.
Yuxarı sinif şagirdlərindən təşkil olunmuş Mülki Müdafiə dəstələri "zəlzələ" olduğu barədə məlumat aldıqdan sonra hadisə yerinə 4 nəfərdən ibarət kəşfiyyat qrupu göndərib. Kəşfiyyatçılar hadisə yerində dağıntı baş verdiyi, 2 nəfərin huşsuz vəziyyətdə olduğu barədə xəbər verdikdən sonra xilasetmə qrupu hadisə yerinə zərərçəkmişləri xilas etmək üçün göndərilib. Xilasetmə qrupu zərərçəkənləri təxliyə edərək tibbi yardım qrupuna təhvil veriblər. Tibbi yardım dəstəsi "yaralı"lara sarğılar və şinalar qoyaraq onları səyyar hospitala yerləşdiriblər.
Məktəbin direktoru Ədalət Camalova çıxış edərək tədbirin əhəmiyyətindən danışıb. Toplantının profilaktik xarakter daşıdığını bildirən Ə. Camaıova buna baxmayaraq, bir anlıq da olsa həyəcan yaşadıqlarını nəzərə çatdırıb. Sözügedən hadisələr zamanı ayıq olmağı və həmin vaxt nəzəri biliklərdən istifadə etməyin zəruriliyini diqqətə çatdıran direktor siniflərdə müşahidələr aparıldığı zaman şagirdlərin mülki müdafiə biliklərinin yüksək səviyyədə olduğunu qeyd edib.
Şamo Əliyev