Xırdalan şəhər 3 saylı körpələr evi-uşaq bağçasında Dünya Azərbaycanlılarının Həmrəylik Günü və Yeni il bayramları münasibəti ilə ənənəvi bayram şənliyi keçirilib.
Hər il olduğu kimi, bu il də şənlik iştirakçılarına yeni tərtibatda hazırlanan proqram təqdim edilib. Bağçanın qış nağılını xatırladan dekorasiyalarla bəzədilməsi, yaradılan əsl bayram əhval-ruhiyyəsi balacaların sevincini daha da artırıb.
Bağçanın müdiri Gülnarə Paşayeva şənlik iştirakçılarını, o cümlədən uşaqları qarşıdan gələn Yeni il münasibəti ilə təbrik edib, onlara sülh və əminamanlıq arzulayıb.
Bayram şənliyi üçün hazırlanan musiqili kompozisiya, balacaların sevimli cizgi filmlərinin qəhrəmanlarını canlandıran personajlar şənlik iştirakçılarında xoş ovqat yaradıb. Səhnəciklər, oynaq, şux mahnılar, rəqslər bayram tədbirini daha da rəngarəng edib.
Balacaların nümayiş etdirdiyi yeni il səhnəcikləri maraqla izlənilib. Uşaqlar Şaxta baba obrazlarını canlandıraraq, şənliyi daha da yaddaqalan ediblər.
Şaxta babanın və Qar qızın hədiyyələrlə şənliyə gəlişi uşaqların gurultulu alqışları ilə qarşılanıb. Şaxta babanın uşaqlarla birlikdə yolkanın işıqlarını yandırması, onlarla rəqs etməsi şənliyə rəng qatıb.
