AMEA-nın Molekulyar Biologiya və Biotexnologiyalar İnstitutunun bioadaptasiya laboratoriyasının elmi işçisi Səmra Mirzəyeva İtaliya Milli Tədqiqat Şurasının Davamlı Bitki Mühafizəsi İnstitutunun Turində yerləşən baş ofisində və həmin institutun Florensiya bölməsində elmi ezamiyyətdə olub.
S.Mirzəyeva İtaliya Milli Tədqiqat Şurasının Davamlı Bitki Mühafizəsi İnstitutunun prezidenti və direktoru Gian Paolo Accotto və Florensiya bölməsinin alimləri ilə görüşüb. Məqsəd Molekulyar Biologiya və Biotexnologiyalar İnstitutu ilə Davamlı Bitki Mühafizəsi İnstitutu arasında elmi əməkdaşlıq zəminində 5 illik razılığın imzalanması, hər iki qurum arasında elmi əməkdaşlıq imkanlarının müzakirəsi olub.
Səmra Mirzəyeva Davamlı Bitki Mühafizəsi İnstitutunun seminarında Molekulyar Biologiya və Biotexnologiyalar İnstitutunun əsas tədqiqat istiqamətləri, həmçinin bioadaptasiya laboratoriyasının elmi işləri haqqında məlumat verib. Onun “Azərbaycanda yetişən tomat bitkisinin əsas viruslarının molekulyar metodlarla təyini” mövzusunda məruzəsi seminar iştirakçılarının böyük marağına səbəb olub.
