Bu gün 8 Mart Beynəlxalq Qadınlar Günü münasibəti ilə Abşeron rayonunda fəaliyyət göstərən bağçaların fidanlarının konserti baş tutub. Abşeron Mədəniyyət Mərkəzində reallaşan tədbirdə Rayon İcra Hakimiyyətinin başçısı İradə Gülməmmədova, İcra Hakimiyyətinin rəsmiləri, təhsil işçiləri, valideynlər və KİV nümayəndələri iştirak ediblər.
Konsertdə əvvəlcə görkəmli oftalmoloq alim, akademik Zərifə xanım Əliyevanın həyat və yaradıcılığını, eləcə də Azərbaycanın birinci xanımı, Heydər Əliyev Fondunun prezidenti, UNESCO və İSESCO-nun xoşməramlı səfiri, millət vəkili Mehriban Əliyevanın fəaliyyətni əks etdirən vidoe-çarx nümayiş olunub.
Xalq artisti Azər Zeynalov, meyxanaçı Namiq Məna və digər mədəniyyət ustaları anaya, vətənə aid müxtəlif janrlarda mahnılar ifa ediblər.
Bundan sonra bağça uşaqlarının hazırladıqları bir-birindən rəngarən səhnələr təqdim olunub. Uşaqlar analara həsr olunmuş şeirlər deyib, mahnılar oxuyub və müxtəlif rəqs nömrələrini göstəriblər.
Abşeron Rayon İcra Hakimiyyətinin başçısı İradə Gülməmmədova çıxış edərək ölkədə aparılan quruculuq və abadlıq işlərindən danışıb, cənab Prezidenti İlham Əliyevin əhalinin rifahı və respublikamızın inkişafı istiqamətində həyata keçirdiyi siyasəti, onun əhəmiyyətini vurğulayıb.
Azərbaycan mədəniyyətinin dünyaya tanıdılmasında və təbliğində Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban Əliyevanın misilsiz xidmətləri olduğunu bildirən İ.Gülməmmədova söyləyib ki, Birinci Xanımın fəaliyyəti Azərbaycan qadınları üçün örnəkdir.
Bizim gələcəyimizin bu gün bağçalarda tərbiyələnən, yetişən, formalaşan fidanlar olduğunu qeyd edən başçı onların dünyagörüşünün, xarakterinin müəyyyənləşməsində həm təhsil, həm də mədəniyyət işçilərinin xüsusi xidmətləri olduğunu deyib. Son 10 ildə rayon ərazisindəki bütün mədəniyyət ocaqlarının, bağça və məktəblərin inzibati binalarının dam örtüklərinin yeniləndiyini, əsaslı təmir olunduğunu və yenilərinin tikildiyini vurğulayan başçı hazırda da bu istiqamətdə işlərin görüldüyünü söyləyib.
İ.Gülməmmədova 8 Mart Beynəlxalq Qadınlar Günü münasibəti ilə başda Birinci Xanım Mehriban Əliyeva olmaqla, Azərbaycanın bütün xanımlarını təbrik edib, onlara fəaliyyətlərində uğurlar arzulayıb.
Abşeron rayonu Mədəniyyət və Turizm şöbəsinin müdiri İlham Manafov isə Qəbələdə keçirilən beynəlxalq mürəbbə yarışmasını xatırladaraq, yarışmada 30-dan çox ölkənin nümayəndəsinin iştirak etdiyini, Azərbaycan mürəbbələlərinin isə xüsusən fərqləndiyini qeyd edib. O bildirib ki, rayon mədəniyyət mərkəzinin mədəni kütləvi təşkilatçısı Gülçin Əzizovanın hazırladığı ağ gilas müərəbbəsi bürünc medala laiq görülüb.
Bürünc medal və fəxri fərman mukafatçıya təqdim edilib.
