Abşeron rayonunda aparılan abadlıq-quruculuq işlərinin tərkib hissəsi olaraq rayon ərazisində yerləşən Hökməli-Qobu yolu yenidən qurulur. Qeyd etmək lazımdır ki, İradə Gülməmmədova Abşeron rayon İcra Hakimiyyətinin başçısı təyin edildikdən sonra məsələnin vacibliyi nəzərə alınaraq sözügedən yolun asfalt örtüyünün tez-tez sıradan çıxmasının səbəbləri araşdırılıb. Məlum olub ki, ərazidə qurunt sularının səviyyəsinin yüksək olması, yağış sularının yol boyu axması, iri tonnajlı maşınların mütəmadi olaraq hərəkət etməsi və qəsəbədə yaşayan sakinlərin konalizasiya sularını yola axıtması asfalt örtüyünün vaxtından əvvəl sıradan çıxmasına səbəb olub. Bütün bunlar nəzərə alınaraq rayonun daxili imkanları hesabına Hökməli-Qobu yolunda yağış və qurunt sularını axıtmaq üçün 815 metr uzunluğunda dəmir-beton tərkibli arx salınıb. Bundan əlavə, 300 metr uzunluğunda konalizasiya xətti çəkilib ki, bu da yağış sularının tam olaraq ümumi konalizasiya xəttinə ötürülməsinə imkan verəcək. Eyni zamanda, ərazidə 4 ədəd baxıcı quyusu tikilərək yağış sularının sərbəst axıntısı təmin edilib. O da vurğulanmalıdır ki, Hökməli-Qobu yolunun sıradan çıxmış hissəsinə çınqıl daşlar tökülərək avtomobillərin hərəkətinin intensivliyi təmin olunub.
Rayon İcra Hakimiyyəti tərəfindən “Azəravtoyol” ASC-ə edilən müraciətdən sonra Hökməli-Qobu yoluna asfalt örtüyünün çəkilməsi işlərinə başlanılıb. Hazırda sözügedən əraziyə çınqıl daşları tökülərək yol örtüyünün bərkidilməsi işləri aparılır. Bu proses başa çatdıqdan sonra 12 min kvadratmetr əraziyə asfalt örütüyü döşənəcəkdir.
Qeyd edək ki, hava şəraitindən asılı olaraq Hökməli-Qobu yolunda aparılan təmir-bərpa işlərinin 13 gün müddətində başa çatdırılması planlaşdırılıb.