Xırdalan şəhər Onbirillik Musiqi Məktəbi ilə Gürcüstandakı Mirzə Fətəli Axundzadə adına Azərbaycan Mədəniyyəti Muzeyi və Mərkəzi arasında əməkdaşlıq əlaqələri uğurla davam etdirilir. Gürcüstandakı M.F.Axundzadə adına Azərbaycan Mədəniyyəti Muzeyi və Mərkəzinin dəvəti, Azərbaycan Respublikası Mədəniyyət və Turizm Nazirliyinin razılığı ilə, mərkəz tərəfindən Tbilisidə keçirilən, görkəmli oftalmoloq alim Zərifə xanım Əliyevanın doğum gününə həsr olunmuş tədbirdə iştirak etmək məqsədilə Aberşon rayon Xırdalan şəhər 11 illik musiqi məktəbinin kollektivi, məktəbin direktoru əməkdar müəllim İkram Manafovun rəhbərliyi ilə 2017-ci ilin 20-27 aprel tarixlərində Gürcüstanda səfərdə olub.
Səfər ərəfəsində məktəb kollektivi "Qardaş məktəblər” layihəsi çərçivəsində qurulmuş əməkdaşlıq əlaqələrinin davamı olaraq, Kutaisi və Xaşuri şəhərlərində fəaliyyət göstərən musiqi məktəblərində də konsert proqramı ilə çıxış edib.
Xaşuridə keçirilən tədbirdə iştirak edən şəhər rəhbərliyinin nümayəndələri Vaza Subitidze, Lili Ruxadze, Liona Tatişvili və başqaları Xırdalan şəhər 11 illik musiqi məktəbinə gələcək işlərində uğurlar arzulayaraq, bu əlaqələrin çox mühüm əhəmiyyət daşıdığını vurğulayıblar.
Sözügedən tədbirlərdə məktəbin kollektivi Azərbaycan klassik və xalq musiqisindən ibarət böyük konsert proqramları ilə çıxış edib.
Şamo Əliyev
