İsti yay günlərində əhalini normal içməli su ilə təmin etmək üçün Abşeron rayonunda nəzərdə tutulan tədbirlərin tam yerinə yetirilməsi məqsədi ilə görülən işlər rayon İcra Hakimiyyəti başçısının tam nəzarətindədir. Abşeron rayonda əhalinin içməli su təchizatının yaxşılaşdırılması və şəhərin kanalizasiya sisteminin yenidən qurulması ilə əlaqədar bir sıra ardıcıl tədbirlər həyata keçirilib. Belə ki, 2017-ci ilin 6 ayı ərzində rayonun yaşayış məntəqələrində müxtəlif diametrli borularla 1926 p/m uzunluqda yeni içməli su xətləri çəkilmiş, 1566 p/m uzunluqda korroziyaya uğramış xətt dəyişdirilmiş, 34 ədəd müxtəlif markalı nasos təmir edilmiş, eləcə də 3312 p/m uzunluqda kanalizasiya xətləri yenilənmişdir.
Daxili imkanlar hesabına Xırdalan şəhərində 28-ci məhəllənin 14 saylı binasının zirzəmisinin çirkab sulardan təmizlənməsi məqsədilə 120 paqometr boru yenisi ilə əvəz edilmiş, 4 dəst baxış quyusu qoyulmuşdur. Xırdalan şəhərinin Xudu Məmmədov küçəsində fərdi yaşayış evlərini su basması ilə əlaqədar 450 paqometr, Masazır kəndinin Cəfər Cabbarlı küçəsində 430 paqometr, Hüseyn Arif Küçəsində 180 paqometr, Saray qəsəbəsinin Cabir Novruz küçəsində 220 paqometr, Aşağı Güzdək qəsəbəsindəki yeni yaşayış massivində 170 paqometr, Mehdiabad qəsəbəsinin Maqsud Abdullayev küçəsində isə 100 paqometr uzunluğunda plastik boru ilə kanalizasiya xəttləri çəkilmişdir.
Azərsu Açıq Səhmdar Cəmiyyəti tərəfindən Novxanı kəndində başlanılmış və uzunluğu 13.2 km olan içməli su və 6.6 km uzunluğunda olan magistral kanalizasiya xəttinin çəkilişində son tamamlama işləri görülməkdədir.
Xırdalan şəhərinin su kanalizasiya sisteminin yenidən qurulması və genişləndirilməsi layihəsinin icrasına başlanılması rayonun həyatında ən böyük tarixi hadisədir. Dəyəri 75 milyon ABŞ dolları olan bu layihənin icrası ilə 2 il ərzində Xırdalan şəhərinin gələcək perespektivi də nəzərə alınmaqla 168 km uzunluğunda müxtəlif diametrli içməli su xəttinin, 108 km uzunluğunda kanalizasiya xətinin çəkilişi işləri həyata keçiriləcəkdir.
Eyni zamanda uzun müddətdir ki, ictimai narahatlıq doğuran məsələlərdən biri də respublika əhalisini duzla təmin edilməsində böyük rolu olan Masazır kəndi ərazisindəki duz gölünə çirkab sularının axıdılması təşkil edirdi. Bununla da bağlı adiyyati qurumlar qarşısında rayon rəhbəri İradə Gülməmmədovanın qaldırdığı məsələlərin nəticəsi olaraq yaxın vaxtlarda nasosxana quraşdırılaraq xətt çəkilişi işlərinə başlanılması da nəzərdə tutulur ki, bununla da uzun müddətdir davam edən böyük bir problemin aradan qaldırılması təmin ediləcəkdir.
Şamo Əliyev