29 avqust 2017-ci il tarixdə Abşeron RİH-də Azərbaycan Respublikası Prezidentinin 21 iyun 2017-cı il tarixli Sərəncamı ilə təltif olunan Haqverdiyev Yusuf Əkbər oğlununun “Dövlət qulluğunda fərqlənməyə görə” medalının təqdim edilməsi mərasimi keçirilib.
Abşeron RİH Başçısı İradə Gülməmmədova əvvəlcə ölkə başçısının Sərəncamına əsasən “Dövlət qulluğunda fərqlənməyə görə” medalı ilə təltif olunan RİHB-nın Fatmayi kənd inzibati ərazi dairəsi üzrə nümayəndəsi Yusuf Haqverdiyevi bir daha təbrik edərək, ona fəaliyyətlərində uğurlar arzulayıb. İ.Gülməmmədova qeyd edib ki, ümummilli lider Heydər Əliyevin dövlət qulluğu haqqında qanunvericilik bazasının yaradılması və təkmilləşdirilməsi sahəsindəki gördüyü böyük əhəmiyyət kəsb edən işlər ulu öndərin siyasi kursunun layiqli davamçısı Prezident İlham Əliyev cənabları tərəfindən əsaslı şəkildə uğurla davam etdirilir. Dövlətimizin başçısının yüksək diqqət və qayğısı sayəsində “Dövlət qulluğu haqqında” Qanundan irəli gələn bütün məsələlər davamlı olaraq həyata keçirilir. Bu sahədə Prezident İlham Əliyevin 25 may 2006-cı il tarixli “Dövlət qulluqçularının Peşə Bayramı Gününün təsis edilməsi haqqında” Sərəncamı dövlət qulluqçularına olan qayğının əyani nümunəsidir.
Sonra Abşeron RİH Başçısı İ. Gülməmmədova “Dövlət qulluğunda fərqlənməyə görə” medalını və vəsiqəni rayon ictimaiyyəti qarşısında təntənəli surətdə RİHB-nın Fatmayı kənd inzibati ərazi dairəsi üzrə nümayəndəsi Yusuf Haqverdiyevə təqdim edib.
Çıxış edən dövlət qulluqçusu Y. Haqverdiyev onun əməyinə verilən yüksək qiymətə görə Prezident İlham Əliyevə dərin minnətdarlığını bildirib.
Şamo Əliyev
