Bu gün prokurorluq işçilərinin peşə bayramıdır. 17 iyul 1998-ci il tarixdə prezident Heydər Əliyev Azərbaycan Xalq Cumhuriyyətinin Nazirlər Şurasının 1 oktyabr 1918-ci il tarixli qərarı ilə Bakı Dairə Məhkəməsinin tərkibində prokurorluq orqanlarının fəaliyyətə başlamasını əsas tutaraq hər il oktyabr ayının 1-ni Azərbaycan Respublikası Prokurorluğu işçilərinin peşə bayramı günü kimi qeyd edilməsi barədə sərəncam imzalayıb.
Mövcudluğu bir çox dövlətlərdə qədim dövrlərdən məlum olan məhkəmə orqanlarından fərqli olaraq, prokurorluq müstəqil institut kimi xeyli sonralar yaranıb. Dövlət idarəetmə mexanizminin tərkib hissəsi kimi prokurorluğun əsası ilk dəfə XlV əsrin əvvəllərində Fransada kral lV Filipp tərəfindən qoyulmuşdur. Onun vaxtında kral mənafelərinin prokurorluq tərəfindən təmsil edilməsi Qanunla (25 mart 1302-ci il tarixli ordanans) təsbit edilib. Həm qərb ölkələri, həm də Rusiya prokurorluqlarına bir örnək kimi böyük təsiri olan Fransa prokurorluğunun təşkili və fəaliyyəti haqqında qanun isə 1586-cı ildə qəbul olunub.
Bu gün Prokurorluq işçilərinin peşə bayramı günü münasibəti ilə Abşeron Rayon Prokurorluğunda tədbir keçirildi.
“1 Oktyabr – Azərbaycan Respublikası Prokurorluğu işçilərinin peşə bayramı günü” Abşeron rayonunda da təntənə ilə qeyd edildi. Abşeron Rayonu İcra Hakimiyyətinin başçısı cənab Zakir Fərəcov, rayon hüquq-mühafizə orqanlarının rəhbərləri və prokurorluq işçiləri rayonun mərkəzində yerləşən Ümummilli lider Heydər Əliyevin abidəsini ziyarət edib önünə əklil və gül dəstələri düzdülər.
Daha sonra Prokurorluq işçilərinin peşə bayramı günü münasibəti ilə Abşeron Rayon Prokurorluğunda tədbir keçirildi.
Tədbiri giriş sözü ilə açan Abşeron Rayon İcra Hakimiyyətinin başçısı cənab Zakir Fərəcov 01 oktyabr – Prokurorluq işçilərinin peşə bayramı münasibəti ilə bütün prokurorluq işçilərini təbrik etdi: "Prokurorluq orqanlarının müstəqil dövlətimizə uyğun formalaşmasında xalqımızın ümummilli lideri, ulu öndər Heydər Əliyevin müstəsna rolu olmuşdur. Bu gün də Hörmətli Prezidentimiz İlham Əliyev də prokurorluq işçilərinə hər zaman diqqət və qayğıkeşliklə yanaşır. Bunun nəticəsidir ki, prokurorluq əməkdaşlarının əmək haqları xeyli artırılmış, şəxsi heyətin məişət şəraiti əsaslı şəkildə yaxşılaşdırılmışdır. Azərbaycan Respublikası Prokurorluğu qanunun aliliyinin, insan hüquq və azadlıqlarının təmin olunmasına, cinayətkarlıqla mübarizəyə, qanunçuluğun və hüquq qaydasının qorunmasına xidməti danılmazdır”.
Tədbirin sonunda cənab Zakir Fərəcov tərəfindən bir neçə prokurorluq orqanı işçisinə fəxri fərmanlar və hədiyyələr təqdim olundu.
Abşeron Xəbər-ə müsahibə verən Abşeron rayon prokurorluğunun böyük köməkçisi Bəhlul Yaqubov qeyd etdi ki, 1986-cı ildə inşa olunan Abşeron rayon prokurorluğunun inzibati binası istismara qismən yararsız olduğundan və müasir tələblərə tam cavab vermədiyindən rayon rəhbəri cənab Zakir Fərəcovun təşəbbüsü ilə əsaslı şəkildə təmir edilmiş və işçilərin fəaliyyəti üçün hərtərəfli şərait yaradılmışdır.
Belə ki, yuxarı mərtəbəsi 8, aşağı mərtəbəsi 7 otaqdan, vətəndaşların qəbulu üşün nəzərdə tutulmuş otaqdan, iclas zalından ibarət ikimərtəbəli inzibati binanın bütün otaqları, sanitar qovşaqları əsaslı təmir və bərpa edilmiş, binanın ərazisində yaşıllaşdırma və abadlıq işləri aparılaraq həyətyanı sahənin asfalt örtüyü və müasir tələblərə cavab verən döşəmə daşları ilə döşənməsi təmin edilmiş, kommunikasiya sistemi yenidən qurularaq digər zəruri tədbirlər görülmüşdür.
Baş redaktor: Şamo Əliyev
