Bu gün Xırdalanda yerləşən Heydər Əliyev Parkında “Ölkəmizi tanıyaq” tur-aksiyasında iştirak edəcək Abşeronlu şagirdlərin yolasalma mərasimi keçirilib. Yolasalmada rayon İcra Hakimiyyətinin başçısının müavini Fuad Cəbrayılov, Təhsil Şöbəsinin müdiri Nazilə Məmmədova, müəllimlər, valideynlər və KİV nümayəndələri iştirak edib.
İştirakçılar əvvəlcə Ümummilli Lider Heydər Əliyevin abidəsini ziyarət edib, xatirəsini ehtiramla yad ediblər. Tədbirdə çıxış edən Abşeron RİH başçısının müavini F.Cəbrayılov Abşeron rayonunda görülən işlərdən, aparılan quruculuq-abadlıq işləri haqqında ətraflı məlumat verib. Rayonun tarixindən, maddi-mədəni abidələrindən söz açan başçının müavini şagirdlərə öz tövsiyələrini verib.
Bildirilib ki, Abşeronda fəaliyyət göstərən bütün məktəbləri təmsil edən 40 şagird 4 gün ərzində Qəbələ-Şəki-Zaqatala rayonlarında səfərdə olacaqlar. Səfər çərçivəsində adıçəkilən rayonlarda tarixi abidələri gəzəcək, oranın adət-ənənələrini öyrənəcək, mətbəxindən dadacaqlar.