Abşeron Rayon İcra Hakimiyyətinin təşəbbüsü ilə koronavirus (COVID-19) pandemiyası ilə əlaqədar növbəti reydlər keçirilib.
Reydlər zamanı icra hakimiyyəti yanında yaradılmış xüsusi komissiyanın üzvləri sakinlərlə görüşüb, tətbiq olunan karantinin, qarşıya qoyulan tələblərin əhalinin sağlamlığının qorunmasına və koronavirus pandemiyasının törədə biləcəyi faciəvi nəticələri qabaqlamağa yönəldiyini ətraflı izah edib, vətəndaşları bütün qaydalara riayət etməyə çağırıblar.
Rayon ərazisində fəaliyyət göstərən şadlıq saraylarında, ictimai nəqliyyatda, müxtəlif mədəni- sosial obyektlərdə, marketlərdə, restoranlarda, məktəblərdə də baxış keçirilib. Vətəndaşlarla maarifləndirici söhbətlər aparılıb, onlar COVID əleyhinə vaksinasiya prosesi ilə bağlı ətraflı məlumatlandırılıb, buster dozanın əhəmiyyəti haqqında məlumat verilib.
Reyd zamanı insanları maraqlandıran suallar cavablandırılıb, eyni zamanda, müəyyən edilmiş tələblərə və qaydalara ciddi şəkildə əməl olunmasının, tibbi mühafizə vasitələrindən, o cümlədən tibbi maskalardan müntəzəm istifadə edilməsinin, vətəndaşlar arasında sosial məsafənin gözlənilməsinin vacibliyi diqqətə çatdırılıb.