Abşeron rayonunda I və II Qarabağ müharibəsində Vətənin bütövlüyü uğrunda canlarını fəda edən şəhidlərimizin əziz xatirəsinə və qazilər üçün iftar süfrəsi açılıb. Tədbirdə Abşeron Rayon İcra Hakimiyyətinin başçısı Abdin Fərzəliyev, rayonun hüquq-mühafizə orqanlarının rəhbərləri, YAP Abşeron rayon təşkilatının sədri, din xadimləri, şəhid ailələri, qazilər və rayon ictimaiyyəti iştirak edib.
İftar süfrəsində şəhidlərimizin əziz xatirəsi bir dəqiqəlik sükutla yad edilib və Dövlət Himni səsləndirilib.
RİH başçısı Abdin Fərzəliyev çıxış edərək bildirib ki, Müzəffər Ali Baş Komandan, Prezident İlham Əliyevin rəhbərliyi altında ordumuz cəmi 44 gün davam edən Vətən müharibəsində düşməni məğlub etdi. Xalqımız “Dəmir yumruq” ətrafında sıx birləşərək 30 illik Vətən həsrətinə son verdi, bütün şəhidlərimizin qisası döyüş meydanında alındı.
Hazırda işğaldan azad olunan dədə-baba yurdlarımızda sürətli və böyük quruculuq, abadlıq işlərinin aparıldığını vurğulayan RİH başçısı çox tez bir zamanda oradakı şəhər və kəndlərimizin yenidən inşa olunacağını, müasir standartlara uyğun infrastruktur və kommunal sistemlərin qurulacağını, beləliklə Qarabağda və Şərqi Zəngəzurda həyatın tezliklə yenidən canlanacağını tədbir iştirakçılarının diqqətinə çatdırıb.
Ramazan günlərində anım tədbirlərinin davamlı keçiriləcəyini, Abşeron rayonunun digər kənd və qəsəbələrində də ayrı-ayrılıqda iftar ziyafətlərinin açılacağını qeyd edən başçı şəhidlərimizin xatirələrinin unudulmayacağını vurğulayıb.
Daha sonra Xırdalan şəhər “Cümə” məscidinin imamı Hacı Azər Qafarov, ilahiyyatçı Hacı Şahin Həsənli, şəhid Elçin Həsənlinin anası Xatirə İsmayılova, şəhid Elşad Həsənovun həyat yoldaşı Aksana Həsənova və Abşeron Rayon Ağsaqqallar Şurasının sədri Nadir Ağayev çıxış edərək Vətən müharibəsində Azərbaycanın əldə etdiyi şanlı Qələbədən, ordumuzun göstərdiyi şücaətlərdən danışıblar.
Çıxışçılar şəhid ailələrinə və qazilərə dövlət səviyyəsində göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya təşəkkürlərini ifadə ediblər.
Sonda din xadimləri şəhidlərin əziz ruhlarına dualar oxuyublar.
