Aprelin 25-də Sumqayıtdakı Təbiət Elmləri Təmayüllü Gimnaziyanın idman meydançasında “Şahin” hərbi-idman oyununun Quba-Xaçmaz zona birinciliyi keçirilib. Yarışa ev sahibliyini Sumqayıt Gənclər və İdman Baş İdarəsi edib.
Yarış Azərbaycanın Dövlət Himninin səsləndirilməsi ilə başlayıb. Ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Tədbirdə Gənclər və İdman Nazirliyinin Vətənpərvərlik və vətəndaşlıq tərbiyəsi sektorunun müdiri Əli Məmmədov, şəhər Gənclər və İdman Baş İdarəsinin rəisi Elgün Hümbətov, Vətən müharibəsi şəhidi Mehrab Niftəliyevin atası Söhrab Niftəliyev çıxış edərək, Vətən müharibəsində Şanlı Ordumuzun göstərdiyi şücaətlərdən, gənc nəslin xalqa, dövlətə sədaqət ruhunda yetişməsində, onların ordu sıralarına hazırlığında “Şahin” hərbi-idman oyununun əhəmiyyətindən danışmış, komandalara uğurlar arzu ediblər.
Daha sonra “Şahin”lər müxtəlif sınaq mərhələlərindən keçməklə öz bacarıqlarını nümayiş etdiriblər.
Qələbə uğrunda Sumqayıt, Siyəzən, Abşeron, Quba, Qusar, Şabran, Xızı və Qubadlı, eləçədə Zəngilan şəhərlərinin komandaları mübarizə aparıb. Abşeron rayonunu bu yarışda “Şahin” hərbi-idman oyunu üzrə Abşeron rayon çempionu Saray qəsəbə 3 saylı tam orta məktəbin komandası təmsil edib. 5 mərhələdən ibarət (1.Sıra hazırlığı, 2.Fiziki hazırlıq, 3.Maneələrin dəf olunması, 4.Mülki Müdafiə hazırlığı, 5.Çadırın qurulması) olan yarışda Abşeron komandası 1-ci yerə layiq görülərək Zona çempionu olub.
Qalib komandalar Gənclər və İdman Nazirliyinin fəxri fərmanları ilə təltif edilib.
Qeyd edək ki, yarışın nəticələrinə uyğun olaraq I və II yerləri tutan komandalar oyunların respublika final mərhələsində mübarizə aparacaqlar.
