Abşeron rayonunun Saray qəsəbəsindəki Şəhidlər Xiyabanının ətrafına və xiyabana aparan yola asfalt örtüyü çəkilib. Qeyd edək ki, bir müddət öncə Abşeron Rayon İcra Hakimiyyətinin başçısı Abdin Fərzəliyev Saraylı şəhid ailələri ilə birgə Şəhidlər Xiyabanını ziyarət etmiş, vətənimizin bütövlüyü uğrunda canlarından keçmiş bütün igidlərimizin əziz xatirəsi yad edilmiş və ruhlarına dualar oxunmuşdur. Ziyarət zamanı şəhid ailələri tərəfindən Şəhidlər Xiyabanının ətrafına və xiyabana aparan yola asfalt örtüyünün çəkilməsi məsələsi qaldırılmış və bu istiqamətdə köməkliyin göstərilməsi xahiş olunmuşdur. Bundan sonra rayonun Abadlıq və Kommunal Xidmətlər İdarəsinin əməkdaşları tərəfindən əraziyə baxış keçirilərək atılacaq addımlar müəyyənləşdirilmiş, əvvəlcə çınqıl daşları tökülərək bərkidilmiş və bundan sonra ümumilikdə 3200 kvadratmetr asfalt örtüyü çəkilmişdir.
Şəhid ailələri yaradılan şəraitdən tam razı qaldıqlarını bildirərək dövlət tərəfindən onlara daima diqqət və qayğının göstərildiyini və buna görə Azərbaycan Respublikasının Prezidenti cənab İlham Əliyevə və Birinci Vitse-prezident Mehriban xanım Əliyevaya minnətdarlıqlarını ifadə etmişlər.
