Abşeron Rayon İcra Hakimiyyətinin təşkilatçılığı ilə Rayon Mədəniyyət Mərkəzində “Peşə və sahə assosiasiyaları”nın yaradılmasının dəstəklənməsi ilə bağlı tədbir keçirilib. Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Abşeron-Xızı Regional Məşğulluq filialı, KOBİA-nın Abşeron nümayəndəliyinin və digər dövlət qurumlarının rəhbərlərinin iştirakı ilə keçirilən tədbirdə rayonda fəaliyyət göstərən peşə məktəbləri, sənaye müəssisələri və ictimai birliklər də təmsil olunublar.
61 müəssisədən nümayəndənin iştirak etdiyi görüşdə Agentliyin fəaliyyət istiqamətləri və məşğulluq xidmətləri ilə bağlı işəgötürənlərə məlumat verilib, mövcud imkanlar və əməkdaşlıq perspektivləri müzakirə edilib, İcra Hakimiyyəti tərəfindən Abşeron rayonunda ərazi məşğulluq proqramının icrası çərçivəsində görülən işlərdən danışılıb. Qeyd olunub ki, Dövlət Məşğulluq Agentliyinin sahibkarlara dəstək məqsədli bir sıra funksional istiqamətləri mövcuddur. Bu istiqamətlər məhz işəgötürənlərin fəaliyyətini dəstəkləməyə, onları uyğun kadrlarla təmin etməyə və dövlət qurumları ilə sahibkarlar arasında əməkdaşlığı inkişaf etdirməyə, qarşılıqlı inam mühitinin yaradılmasına hədəflənib.
Abşeron Rayon İcra Hakimiyyəti başçısının müavini Gülnar Rəhimova çıxış edərək, Azərbaycan Respublikasının Prezidenti cənab İlham Əliyev tərəfindən uğurla reallaşdırılan dövlət siyasətinin başlıca istiqamətinin əhalinin rifah səviyyəsinin yüksəldilməsi, məşğulluğunun təmin edilməsi olduğunu qeyd edib. O bildirib ki, bu baxımdan Azərbaycan Respublikası Prezidentinin 2020-ci il 13 fevral tarixli Sərəncamı ilə təsdiq olunmuş “Məşğulluq Strategiyasının həyata keçirilməsinə dair 2020–2025-ci illər üçün Tədbirlər Planı” xüsusi əhəmiyyət kəsb edir.
Tədbirin digər müzakirə məsələləri sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşların məşğulluğunu təmin etmək üçün kvota tətbiq edilməsi, sosial iş yerlərində işçilərin əməkhaqqının bir hissəsinin maliyyələşdirilməsi qaydası, peşə hazırlığının təşkili və digər məşğulluq tədbirləri ilə bağlı olub. Bu istiqamətdə işəgötürənləri maraqlandıran suallar da cavablandırılıb.
Sonda Agentliyin müxtəlif fəaliyyət istiqamətlərindən faydalanan işəgötürənlərin fikirləri dinlənilib, digərləri də birgə əməkdaşlığa dəvət edilib.
Qeyd edək ki, gündəlikdə duran məsələ Azərbaycan Respublikası Prezidentinin 13 fevral 2020-ci il tarixli, 1816 nömrəli Sərəncamı ilə təsdiq olunmuş “Məşğulluq Strategiyasının həyata keçirilməsinə dair 2020–2025-ci illər üçün Tədbirlər Planı”nın 4.5-ci bəndinin (Peşə və sahə assosiasiyaları yaradılmasının dəstəklənməsi) icrasının təmin edilməsi olub.
