Abşeron Rayon İcra Hakimiyyəti, Abşeron-Xızı Regional Təhsil İdarəsi və Abşeron Rayon Polis İdarəsinin birgə təşkilatçılığı ilə uşaqların təhsildən yayınmasının qarşısının alınması məqsədilə Abşeron rayonunda fəaliyyət göstərən ümumi təhsil müəssisələrində maarifləndirici görüşlər keçirilib.
Xırdalan şəhərində, eləcə də rayonun kənd və qəsəbələrində yerləşən təhsil müəssisələrində baş tutan görüşlərdə Ulu Öndər Heydər Əliyevin əsasını qoyduğu dövlət-gənclər siyasətinin Prezident İlham Əliyev tərəfindən uğurla davam etdirildiyini, Prezident İlham Əliyevin gənclər siyasəti ilə bağlı imzaladığı fərman və sərəncamların, qəbul edilən dövlət proqramlarının yeniyetmə və gənclərin hərtərəfli inkişafı üçün geniş imkanlar açdığını vurğulayan Abşeron Rayon İcra Hakimiyyəti başçısının müavini Gülnar Rəhimova məktəblilərə Uşaq Hüquqları haqqında Konvensiya və “Uşaq hüquqları haqqında” Azərbaycan Respublikasının Qanunu, eləcə də “Uşaqlara dair Strategiyanın həyata keçirilməsi üzrə 2020-2025-ci illər üçün Fəaliyyət Planında haqqında məlumat verib.
Görüşlərdə çıxış edən Abşeron Rayon Polis İdarəsinin Yetkinlik yaşına çatmayanlarla profilaktiki işin təşkili qrupunun baş inspektoru, polis mayoru Elbrus Əhmədov qızların təhsildən yayınma hallarının mövcud olduğunu qeyd edərək, bu problemin həllinə kompleks şəkildə yanaşmanın və əlaqəli qurumların əməkdaşlığının vacibliyini vurğulayıb.
Tədbirlərdə mövzu ətrafında fikir mübadilələri aparılıb, iştirakçıları maraqlandıran suallar cavablandırılıb.
