Dövlət-sahibkar əməkdaşlığı platforması çərçivəsində Abşeron Rayon İcra Hakimiyyətinin, Kiçik və Orta Biznesin İnkişafı Agentliyinin (KOBİA) və Abşeron-Xızı Regional Məşğulluq filialının birgə təşkilatçılığı ilə Abşeron rayonunda fəaliyyət göstərən sahibkarlarla görüşlər keçirilib.
Abşeron rayonunun kənd və qəsəbələrində, eləcə də Xırdalan şəhərində təşkil olunan görüşlərdə rayon üzrə olan iş imkanlarının vahid formada təqdim edilməsi, daxil olan məşğulluqla bağlı müraciətlərin müvafiq olaraq birbaşa sahibkarlıq subyektlərinə yönləndirilməsi, məşğulluq məsələlərində işaxtaran və işverənlər arasında münasibətlərin formalaşdırılması məsələləri müzakirə olunub.
Görüşdə Abşeron RİH-in, Abşeron “KOB Dostunun, Sahibkarlığın İnkişafı Fondunun və Abşeron-Xızı Regional Məşğulluq filialının səlahətli şəxsləri çıxış edərək sahibkarlıq sahəsində həyata keçirilən layihələr, dövlət dəstəyi tədbirləri, özünüməşğulluq proqramına müraciət qaydaları, peşəyönümlü təhsil, biznes layihələrinin maliyyələşdirilməsi barədə, həmçinin sahibkarların ticarət şəbəkələrinə və maliyyə resurslarına çıxışına, vergi qanunvericiliyinə və digər məsələlərə dair ətraflı məlumat veriblər.
Tədbirlərdə çıxış edən sahibkarlar fəaliyyət dairələrinin genişləndirilməsi, yeni iş yerlərinin açılması ilə bağlı görüləcək işlərdən danışıb, bu istiqamətdə öz təkliflərini irəli sürüb, onlara göstərilən dövlət qayğısından razı olduqlarını və buna görə də Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə ediblər.
Tədbirin digər müzakirə məsələləri sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşların məşğulluğunu təmin etmək üçün kvota tətbiq edilməsi, sosial iş yerlərində işçilərin əməkhaqqının bir hissəsinin maliyyələşdirilməsi qaydası, peşə hazırlığının təşkili və digər məşğulluq tədbirləri ilə bağlı olub. Bu istiqamətdə işəgötürənləri maraqlandıran suallar da cavablandırılıb.
Qeyd edək ki, gündəlikdə duran məsələ Azərbaycan Respublikası Prezidentinin 13 fevral 2020-ci il tarixli, 1816 nömrəli Sərəncamı ilə təsdiq olunmuş “Məşğulluq Strategiyasının həyata keçirilməsinə dair 2020–2025-ci illər üçün Tədbirlər Planı”nın 4.5-ci bəndinin (Peşə və sahə assosiasiyaları yaradılmasının dəstəklənməsi) icrasının təmin edilməsi olub.
