Abşeron rayonunda 20 Yanvar faciəsi qurbanlarının xatirəsi dərin ehtiramla anılıb. Xırdalan şəhərində 20 Yanvar şəhidlərinin xatirə abidəsinin qarşısında keçirilən anım mərasimində rayon icra hakimiyyətinin başçısı Abdin Fərzəliyev, rayonun hüquq-mühafizə orqanlarının rəhbərləri, idarə, müəssisə və təşkilatların sədrləri, şəhid ailələri, qazilər, veteranlar və rayon ictimaiyyətinin nümayəndələri iştirak ediblər.
Tədbir iştirakçıları şəhidlərin xatirəsinə ucaldılmış “Abidə” kompleksini ziyarət edib, üzərinə tər çiçəklər düzüblər.
Sonra Şəhidlər xiyabanı, İkinci Fəxri xiyaban və Xırdalan şəhərindəki Şəhidlər xiyabanı ziyarət edilib, şəhidlərin ruhlarına dualar oxunub.
Daha sonra Xırdalandakı Heydər Əliyev Mərkəzində şəhid ailələrinin, qazilərin və 20 Yanvar hadisələri əlillərinin iştirakı ilə görüş keçirilib.
Görüşdə bildirilib ki, 1990-cı ildə sovet ordusu xalqımızın azadlıq əzmini qıra bilməmiş, qəhrəman oğul və qızlarımız özlərini güllə qabağına verərək Vətənimizin azadlığını, şəhidliyi hər şeydən üstün tutmuşlar. Qeyd edilib ki, faciəyə ilk etiraz səsini ucaldan məhz Ümummilli Lider Heydər Əliyev olub. Faciədən dərhal sonra Ulu Öndər sovet hakimiyyətinin törətdiyi qətliamı bütün dünyaya bəyan edib, 1994-cü ildə isə məhz onun sayəsində 20 Yanvar faciəsinə hüquqi-siyasi qiymət verilib.
Eyni zamanda, vurğulanıb ki, Vətənin azadlığı uğrunda canından keçən şəhidlərimizin xatirəsi daim əziz tutulduğu kimi, onların ailə üzvləri də hər zaman dövlət qayğısı ilə əhatə olunub.
