Dekabrın 15-də Abşeron rayon Heydər Əliyev Mərkəzində “Yeni Abşeron” qəzetinin 1 illik yubileyi ilə əlaqədar mərasim keçirilib.
Qəzetin baş redaktoru Şəhla Ağbulud çıxış edərək mətbu orqanın keçdiyi şərəfli yoldan, əldə olunmuş uğurlardan danışıb, ötən bu 1 ildə onun milli mətbuatımızın ənənələrinə, dövlətə və dövlətçiliyə, xalqa sədaqət yolu tutduğunu vurğulayıb. Ş.Ağbulud qəzetin ərsəyə gəlməsində göstərdiyi maddi və mənəvi dəstəyə görə Abşeron RİH başçısı İradə Gülməmmədovaya minnətdarlığını bildirib.
Azərbaycan Yazıçılar Birliyinin Yaradıcılıq məsələləri üzrə katibi İlqar Fəhmi mərasimdə çıxış edərək qəzetin kollektivini 1 illik yubiley münasibətilə təbrik edib. O deyib ki, “Yeni Abşeron” qəzeti Azərbaycan Yazıçılar Birliyində özünəməxsus yeri olan nəşrlərdən biridir.
İ.Fəhmi əmin olduğunu bildirib ki, “Yeni Abşeron” qəzeti bundan sonra da Azərbaycan cəmiyyətinə, dövlətçiliyinə sədaqətlə xidmət edəcək.
Abşeron RİH-in əməkdaşı Seymur Qasımov qəzetin kollektivini təbrik edərək deyib ki, qəzet cəmiyyətimizin informasiya tələbatının ödənilməsində mühüm rol oynayıb.
Mərasimdə çıxış edən Abşeron RİH-in əməkdaşı Tofiq Abdullayev “Yeni Abşeron” qəzetinin mühüm xidmətlər göstərdiyini, öz missiyasını uğurla yerinə yetirdiyini vurğulayıb. Bildirib ki, fəaliyyətə başladığı dövrdə şeir və hekayələrini cəmiyyətə çatdırmaq üçün ziyalılar “Yeni Abşeron” qəzetində çıxış edirdilər.
Daha sonra “Abşeron” qəzetinin baş redaktoru Elimxan Mehrəliyev, Rayon Ağsaqallar Şurasının sədri Nadir Ağayev və başqaları qəzetin kollektivini təbrik edib, onlara uğurlar arzulayıblar.
Mərasim incəsənət ustalarının maraqlı konsert proqramı ilə davam edib.
Şamo Əliyev