Qobu qəsəbəsində tarzən Nicat Məmmədovun rəhbərliyi ilə Qobu qəsəbə Uşaq İncəsənət Məktəbinin Xalq Çalğı Alətləri orkestri konsert proqramı ilə çıxış edib .
Əvvəlcə Qobunun keçmiş musiqi həyatınan bəhs edən video nümayiş olunub.
Qobu qəsəbə Uşaq İncəsənət məktəbinin sözün həqiqi mənasında çal-çağırlı bir ünvan və qəsəbənin mədəniyyət və sənət mərkəzi olduğunu vurğulayan məktəbin müdiri Azər Bayramov qeyd edib ki, bu gün xalq çalğı alətləri şöbəsinin hesabatı ilə yanaşı, həmdə 1954-cü ildə indiki 2 saylı tam orta məktəbdə Qobuda ilk bədii özfəaliyyət ansamblının yaradılmasının 65 illik yubileyidir. Bildirilib ki, ansamblın yaradıcısı məktəbin dil və ədəbiyyat müəllimi,həmçinin musiqi həvəskarı Balağa Quliyev olub. 1960-cı illərin ortalarında qəsəbə Mədəniyyət evi nəzdində “İlham”xalq çalğı alətləri ansamblı təşkil olunmuşdur .Onun yaradıcıları isə Qasım Qasımov,Pərvaz Şəkərov və Mirzəli(Sabir) Ağaəliyev idi.
A.Bayramov həmçinin qeyd edib ki, 2010-cu ildən Xalq Çalğı Alətləri orkestri Nicat Məmmədova həvalə olunmuşdur. 2014-cü ildən ansamblın tərkibi genişləndirilərək,orkestr səviyyəsinə gəlib çatmışdır.Hər il olduğu kimi bu ilki tədris ili də məktəbimiz üçün və o cümlədən orkestrimiz üçün də əlamətdar olmuşdur.2019-cu ilin yanvarında ARB Günəş televiziya-kanalında orkestr 3 nömrəsiylə çıxış etmişdir.Bu ilin Aprel ayında Xırdalan şəhərində keçirilən Bölgələrdən bölgələrə yaradıcılıq festivalında da orkestr uğurla çıxış etmişdir.
Konsertdə Azərbaycan bəstəkarlarının Xalq Çalğı Alətləri Orkestri üçün yazdığı əsərlərə müraciət edilib. Orkestr və solistlərin ifasında Azərbaycan bəstəkarlarının həm solo, həm instrumental, həm də vokal-instrumental əsərləri konsertə rəngarənglik qatıb.
Konsert bəstəkar S.Rüstəmovun “İntizar” mahnısının ifası ilə yekunlaşıb.
Şamo Əliyev
