Bu gün Xırdalan şəhərindəki Heydər Əliyev adına mədəniyyət və istirahət parkında Abşeron rayon İcra Hakimiyyəti və Mədəniyyət Mərkəzinin birgə təşkilatçılığı ilə Respublika Günü münasibətilə konsert proqramı təşkil edilib
Tədbirdə qeyd olunub ki, 23 ay yaşamasına baxmayaraq, Azərbaycan Xalq Cümhuriyyəti tarixinin hər bir səhifəsi bütün azərbaycanlılar üçün əzizdir. Çünki cümhuriyyətin yaradılması o dövrdə Azərbaycan milli azadlıq hərəkatının böyük nailiyyəti, tarixi dövlətçiliyimizin uğurlu nəticəsi idi. Demokratik respublikanın yaranması ilə birlikdə Azərbaycan xalqının, onun mütəfəkkir insanlarının müstəqilliklə bağlı arzu və istəkləri də reallaşıb.
Vurğulanıb ki, bu gün müstəqil Azərbaycan Respublikası Xalq Cümhuriyyətinin siyasi varisi kimi dünya dövlətləri sırasında öz layiqli yerini tutub. 1993-cü ildən başlayaraq ulu öndər Heydər Əliyev tərəfindən Azərbaycanın dövlətçiliyinin qorunması üçün qətiyyətli tədbirlər həyata keçirilib, ölkədə davamlı ictimai-siyasi sabitlik bərqərar edilib, dövlətimiz strateji inkişaf yoluna çıxarılıb. Bu gün Prezident cənab İlham Əliyev ümummilli liderimizin yolunu uğurla davam etdirir. Ölkəmizdə və aparılan iqtisadi və sosial islahatlar öz bəhrəsini verir.
Konsert proqramında bir-birindən maraqlı musiqi nömrələri tamaşaçılara əsl bayram əhval-ruhiyyəsi bəxş edib.
Şamo Əliyev