Abşeron rayon Xırdalan şəhər 11 illik musiqi məktəbinin kollektivi İsmayıllıda konsert proqramı ilə çıxış edib.
Məktəbin direktoru, Əməkdar müəllim İkram Manafov bildirib ki, Sumqayıt Regional Mədəniyyət İdarəsinin dəstəyi ilə Abşeron rayon Xırdalan şəhər 11 illik musiqi məktəbinin kollektivi İsmayıllı şəhər F.Əzimov adına uşaq incəsənət məktəbinin qonağı olub.
İ.Manafov tədbirin həm də regionlararası əlaqələrin gücləndirilməsi və qarşılıqlı yaradıcılıq əlaqələrinin qurulması məqsədilə keçirildiyini vurğulayıb.
Xırdalan şəhər 11 illik musiqi məktəbinin direktoru İkram Manafov və F.Əzimov adına uşaq incəsənət məktəbinin direktoru Bəhruz Həşimov bu kimi tədbirlərin məktəblər arasında sıx münasibətlərin yaranmasında, şagirdlərin bədii-estetik zövqünün formalaşmasında, onların musiqi sahəsində inkişafında əhəmiyyətli rolundan danışıblar.
Sonra abşeronlu gənc musiqiçilərin çıxışları olub. Konsertdə məktəbin xalq çalğı alətləri, fortepiano və xanəndəlik sinfi şagirdlərinin ifasında muğamlar, xalq və bəstəkar mahnıları, o cümlədən dünya və Azərbaycan bəstəkarlarının əsərləri səslənib.
