Xırdalan şəhərində yerləşən 15 nömrəli körpələr evi-uşaq bağçasında noyabrın 25-də keçirilən bayram tədbirində balaca sakinlərin sevinci yerə-göyə sığmırdı. Onlar Xırdalanın şəhər statusu almasının 10 illiyini bayram edirdilər. Şənlikdə bağçanın pedaqoji kollektiv üzvləri və valideynlərlə yanaşı media nümayəndələri də iştirak ediblər.
Bayram şənliyi bağçanın balaca sakinlərinin "Abşeron" mahnısının sədaları altında zala daxil olmaları ilə başlanıb.
Aparıcı uşaqları salamlayıb bu günlər rayonumuzun hər yerində bayram əhvali-ruhiyyəsinin yaşandığını, Abşeron sakinlərinin vaxtilə qəsəbə olmuş Xırdalanın şəhər statusu almasının 10 illiyini qeyd etdiyini bildirib və bu əziz bayram münasibəti ilə hamını təbrik edib.
Tədbirdə həmçinin Xırdalan şəhərinin inkişafından , Abşeron rayonunun tarixi, mədəniyyəti və görkəmli şəxsiyyətlərindən bəhs edən video-çarx da nümayiş edilib.
Sonra balaca fidanlar şəhərimizə, bayrağımıza, gerbimizə, bayrağımızın rənglərinə aid şeir parçaları söyləyiblər. Uşaqlar "Abşeron bağları " mahnısını ifa ediblər. Tədbirdə ən çox yaddan qalan Xırdalanın şəhər statusu alması münasibəti ilə bir qrup körpə fidanların flashmob keçirməsi olub. Flashmobda əvvəlcə hər kəs eyni anda eyni hərəkətlərlə rəqs edib və daha sonra onlar “XIRDALAN 10” yazısını flashmob ediblər .Daha sonra, şənlik mahnı və rəqslərlə davam edib və körpə fidanların "Zəfəran " mahnısına rəqs etmələri ilə başa çatıb.
Sonda bağçanın müdiri Mətanət Novruzova əlamətdar gün münasibətilə uşaqları təbrik edərək, onlara firavan gələcək arzulayıb, rayonumuzda uşaqlara göstərilən qayğıdan, onların hüquqlarının qorunması, sağlam böyümələri, təhsili istiqamətində görülən işlərdən danışıb.
Şamo Əliyev
