Abşeron rayon İcra Hakimiyyətinin və Rayon Təhsil Şöbəsinin birgə təşkilatçılığı ilə Yanvar faciəsinin 30-cu ildönümünə həsr edilmiş silsilə tədbirlər çərcivəsində növbəti tədbir Mehdiabad qəsəbəsindəki 5 nömrəli tam orta məktəbdə qəsəbədə yerləşən 5 məktəbin iştirakı ilə keçirilib.
Abşeron RİH-nin əməkdaşlarının, RTŞ-nın müdiri Nazilə Məmmədovanın, Mehdiabad məktəblilərinin və qəsəbə sakinlərinin iştirak etdikləri tədbirdə əvvələcə 20 Yanvar hadisələrini təcəssüm etdirən videoçarx nümayiş etdirilib. Sonra dövlət himni səsləndirilib, 20 yanvar şəhidlərin əziz xatirəsi bir dəqiqəlik sükutla yad edilib.
Tədbirdə məktəbin direktoru Samirə Ələkbərova 20 Yanvar hadisələrinin başvermə səbəbləri və acı nəticələrindən danışıb. Bildirilib ki, hər il olduğu kimi, bu il də Mehdiabad qəsəbəsində yerləşən 5 məktəbdə Qanlı Yanvara həsr olunmuş açıq dərslər keçirilib. Siniflər üzrə təşkil olunan sərgilərdə faciə ilə əlaqədar fotolar, məktəblilərin çəkdikləri rəsmlər nümayiş etdirilib. Məktəblərin ibtidai sinif şagirdlərinin Şəhidlər xiyabanına ziyarəti təşkil olunub.
S.Ələkbərova 20 Yanvar hadisələrinin xalqımızın azadlıq mübarizəsi tarixində şanlı səhifə olduğunu vurğulayıb. Qeyd olunub ki, Vətənimizin azadlığı, müstəqilliyi uğrunda canlarını qurban verən şəhidlər ölməzliyə qovuşaraq tariximizin şərəfli səhifəsini yazıblar. Onların qəhrəmanlığı gənclərə əsl vətənpərvərlik nümunəsidir.
Sonda Mehdiabad məktəblilərinin Qanlı Yanvara həsr etdikləri ədəbi-bədii kompozisiyaları nümayiş olunub.
