Abşeron rayon İcra Hakimiyyətinin təşəbbüsü, Rayon Mədəniyyət Mərkəzi Qobu qəsəbə Sənətkarlıq evi və Qobu qəsəbə uşaq incəsənət məktəbinin birgə təşkilatçılığı ilə 20 yanvar faciəsinin 30-cu il dönümünə həsr olunmuş “Şəhidlik-əbədilik zirvəsidir” adlı anma mərasimi keçirilib.Tədbir iştirakçıları əvvəlçə 20 Yanvar faciəsinə həsr olunmuş rəsmlərindən ibarət sərgiyə baxıblar. Abşeron RİH-nin nümayəndələrinin, rayonun mədəniyyət işçilərinin və qəsəbə sakinlərinin iştirak etdikləri tədbirdə dövlət himni səsləndirilib, 20 yanvar şəhidlərin əziz xatirəsi bir dəqiqəlik sükutla yad edilib.
Tədbirdə çıxış edənlər Yanvar faciəsini doğuran səbəblər və onun acı nəticələri barədə danışıb, 20 Yanvarı xalqımızın azadlıq mübarizəsinin qəhrəmanlıq səhifəsi kimi qiymətləndiriblər. Qeyd olunub ki, böyük itkilərlə, günahsız insanların qətli və yaralanması ilə nəticələnən 20 Yanvar faciəsi cinayətkar imperiya rəhbərlərinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın mübarizliyini, əyilməzliyini bütün dünyaya nümayiş etdirib. Həmin qanlı hadisələrdən uzun illər keçməsinə baxmayaraq xalqımız o müdhiş gecəni daim xatırlayır, faciənin səbəbkarlarını lənətləyir.
Daha sonra Abşeron Rayon Mədəniyyət Mərkəzinin nəzdində fəaliyyət göstərən Xalq Teatrının ifasında “Şəhidlik-əbədilik zirvəsidir” adlı kompozisya nümayiş olunub.