Xırdalanda 15 İyun - Milli Qurtuluş Gününün 23-ci ildönümü münasibətilə tədbir keçirilib. Yeni Azərbaycan Partiyası Abşeron Rayon Təşkilatı tərəfindən düzənlənən tədbirdə partiyanın Abşeron rayon təşkilatının sədri Bilman Vəliyev, rayon Gənclər və İdman idarəsinin rəisi Əsgər Əmirəliyev, YAP Abşeron rayon təşkilatının qadınlar şurasının sədri Təyyübə Hüseynova, YAP Abşeron rayon təşkilatının gənclər birliyinin sədri Elgün Hümbətov və digər rəsmi nümayəndələr iştirak edib.
B.Vəliyev bildirib ki, “Milli Qurtuluş Günü” kimi qeyd olunan 15 iyun 1993-cü il tarixi - Azərbaycan xalqının ümummilli lideri Heydər Əliyevin Ali Sovetin Sədri seçilməsi, Azərbaycanın siyasi tarixində keyfiyyətcə yeni bir mərhələnin başlanğıcı oldu: “Ölkənin mürəkkəb kataklizmlərlə müşayiət edilən daxili siyasi böhrandan qurtulması məhz bundan sonra mümkün oldu. Belə ki, ümummilli lider Heydər Əliyevin zəngin dövlətçilik təcrübəsi əsasında atdığı zəruri strateji addımlar sayəsində ölkədə hökm sürən dağıdıcı proseslərin mərhələli şəkildə neytrallaşdırılmasına nail olundu. Beləliklə, ulu öndərin adı ilə bağlı olan “Milli Qurtuluş Günü” Azərbaycan tarixinin şanlı qürur səhifəsinə çevrildi”.
Ə.Əmirəliyev də 15 iyun Qurtuluş Günü ərəfəsində gənclərin iştirakı ilə tədbirin keçirilməsinin əlamətdar hal olduğunu qeyd edərək ümummilli lider Heydər Əliyevin gənclərə göstərdiyi qayğıdan, onlara inkişaf etmək, özünü təsdiqləmək üçün yaradılan yüksək şəraitdən və bu siyasətin Prezident İlham Əliyev tərəfindən uğurla davam etdirilməsindən danışıb.
E.Hümbətov da Yeni Azərbaycan Partiyasının Cənubi Qafqazda ən böyük siyasi qüvvə olduğunu və gənclərin partiyaya axının günü-gündən artdığını bildirib.
Şamo Əliyev