Abşeron rayon İcra Hakimiyyətinin, Gənclər və İdman idarəsinin və Dini Qurumlarla İş Üzrə Dövlət Komitəsinin (DQİDK) birgə təşkilatçılığı ilə “Narkomaniyaya qarşı mübarizə sağlam həyat deməkdir” mövzusunda “dəyirmi masa” keçirilib. Xırdalan şəhərindəki Heydər Əliyev Mərkəzində reallaşan tədbirdə Abşeron rayon İH-nin böyük məsləhətçisi, Rayon Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyasının məsul katibi Hafiz Mikayılov bu səpkili tədbirlərin maarifləndirici əhəmiyyətindən danışıb, narkomaniya və onun cəmiyyətdə törətdiyi fəsadlar haqqında ətraflı məlumat verib.O bildirib ki, narkomaniya ilə mübarizə uzunmüddətli, çoxşaxəli, geniş maliyyə vəsaiti tələb edən dinamik bir prosesdir. Problemin ictimai təhlükəliliyi isə ondan ibarətdir ki, bu cinayət həmişə gizli şəraitdə baş verir, nəzarətdən kənarda qalır və durmadan artır.
Toplantıda Abşeron rayon Gənclər və İdman idarəsinin rəsi Əsgər Əmirəliyev narkomaniyanın insanlara, xüsusilə gənc nəslə vurduğu zərərdən söz açıb. Onun qarşısını almaq istiqamətində görülən işlərədn danışıan idarə rəisi narkomaniyaya qarşı bütün cəmiyyətin mübarizə aparmalı olduğunu vurğulayıb.
Abşeron rayon İcra Hakimiyyətinin ictimai-siyasi və humanitar məsələlər üzrə şöbəsinin müdir müavini Vüqar Bəşirov çıxış edərək cəmiyyətin sağlam inkişafına, mənəviyyatına, onun genefondu olan gəncliyinə ağır zərbə vuran narkomaniya ilə mübarizə tədbirlərindən, bu məsələnin Azərbaycan Dövlətinin ümumi siyasətinin əsas tərkib hissəsinə çevrilməsindən, ölkəmizin beynəlxalq sazişlərə qoşulmasından, qanunsuz dövriyyədə olan narkotiklərin aşkar edilməsindən, narkotiklərin qəbulunun insan orqanizmi üçün zərərli nəticələrindən və belə hallara qarşı ölkəmizdə aparılan profilaltik tədbirlərdən danışıb.
