Dekabrın 23-də keçiriləcək bələdiyyə seçkilərilə əlaqədar təbliğat-təşviqat kampaniyası çərçivəsində YAP Abşeron rayon təşkilatı Saray qəsəbəsində seçicilərlə növbəti görüş keçirib. Görüşdə çıxış edən YAP Abşeron rayon təşkilatının sədri Bilman Vəliyev bələdiyyə seçkilərilə bağlı ümumi məlumat verib. O, deyib ki, bələdiyyələr Azərbaycanda yaranmış gənc özünüidarəetmə strukturudur: "Ötən müddət ərzində bələdiyyələrin fəaliyyətində bəzi çatışmazlıqlar olsa da, bu gün artıq onlar aradan qaldırılmaq üzrədir. Yəni, bələdiyyələrlə bağlı qanunvericilik bazası gücləndirilib, bu strukturların fəaliyyətinin daha da təkmilləşdirilməsi üçün bir sıra vacib qanunlar qəbul edilib”.
Tədbirdə çıxış edən millət vəkili İmamverdi İsmayılov bələdiyyələrin fəaliyyəti barədə məlumat verdikdən sonra Saray qəsəbəsi bələdiyyəsinin fəaliyyətini qənaətbəxş hesab etdiyini diqqətə çatdırıb. Yeni Azərbaycan Partiyasının cəmiyyətdə böyük nüfuza və dəstəyə malik olduğunu söyləyən səlahiyyətli nümayəndə bildirib ki, bu, özünü dekabrın 23-də keçiriləcək bələdiyyə seçkilərində də göstərəcək.
Sonda çıxış edən YAP-ın Saray qəsəbəsi bələdiyyəsinə namizədləri Vəsilə Əbilhəsənova və Təyyubə Hüseynova seçiləcəkləri təqdirdə onlara göstərilən etimadı doğrultmaq üçün əzmlə çalışacaqlarını bildiriblər. Çıxış edən seçicilər isə budəfəki bələdiyyə seçkilərində də YAP-ın namizədlərinə səs verəcəklərini deyiblər.
