Daxili İşlər Nazirliyinin (DİN) Baş Dövlət Yol Polisi İdarəsinin təşəbbüsü ilə Abşeron rayon məktəblilərinin Yol Patrul Xidməti Alayının 1-ci tağımının Saray qəsəbəsindəki stasionar postuna ekskursiyası təşkil edilib.
“Yol polisimizlə bir gün” adlı tədbir “Azərbaycan Respublikasında yol hərəkəti təhlükəsizliyinə dair 2019-2023-cü illər üçün Dövlət Proqramı”nın məqsədlərinə uyğun olaraq Daxili İşlər və Təhsil nazirliklərinin həyata keçirdikləri birgə əməkdaşlıq tədbirləri çərçivəsində baş tutub. Ekskursiyanın keçirilməsində əsas məqsəd yol hərəkəti təhlükəsizliyinin təbliği ilə bağlı təhsil müəssisələrində aparılan maarifləndirmə işini daha da gücləndirmək, bu işdə uşaq və yeniyetmələrin fəal iştirakına nail olmaqdır.
Ekskursiyada Xırdalan şəhər 1, 2, 4, 5, 7 və 9 nömrəli tam orta məktəblərin çalışqan şagirdlərinin bir qrup və təhsil işçiləri iştirak ediblər. Stasionar postda şagirdlərə yol-patrul xidməti inspektorlarının xidməti fəaliyyəti, yol hərəkəti iştirakçılarının təhlükəsizliyi üçün görülən tədbirlər, inzibati hüquqpozmalara, eləcə də cinayətkarlığa qarşı aparılan mübarizə tədbirləri barədə məlumat verib. Burada məktəblilərə xüsusi texniki vasitələr nümayiş etdirilib və postun iş fəaliyyətini canlı izləmək imkanı yaradılıb.
Sonra DİN-in Baş DYP İdarəsinin inzibati binasına gələn şagirdlər burada binanın struktur quruluşu, konfrans zalı və digər obyektlərlə tanış olub, Operativ Müşahidə Mərkəzinin, növbətçi hissənin iş prosesini birbaşa izləyiblər.
Tədbir zamanı şagirdlərin sualları cavablandırılıb və onlara İdarənin əməkdaşları tərəfindən hədiyyələr təqdim olunub.
Şagirdlərin cəlb olunduğu “Yol polisimizlə bir gün” tədbirinin digər regionlarda da keçirilməsi nəzərdə tutulur.
