Ölkəmizdə 2022-ci ilin “Şuşa İli” elan olunması ilə bağlı Abşeron Rayon İcra Hakimiyyətinin təşkilatçılığı ilə Abşeron Rayon Təhsil Şöbəsinin tabeliyində olan təhsil müəssisələrində silsilə tədbirlər keçirilir. Belə tədbirlərdən biridə Abşeron rayon Uşaq Gənclər İnkişaf Mərkəzində təşkil edilib.
Tədbirdə əvvəlcə ölkəmizin ərazi bütövlüyü uğrunda canından keçmiş qəhrəman vətən oğullarının xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.
Ziyalıların, şair və yazıçıların, şəhid ailələrinin, məktəblərin pedaqoji kollektivlərinin, valideyn və şagirdlərin iştirak etdikləri tədbirdə çıxış edən Abşeron rayon Uşaq Gənclər İnkişaf Mərkəzinin direktoru Aytən Rüstəmova qeyd edib ki, Prezident İlham Əliyev tərəfindən Şuşa şəhərinin 270 illiyi ilə əlaqədar ölkəmizdə 2022-ci il “Şuşa ili” elan olunub. O qeyd edib ki, 30 ilə yaxın işğal altında olan Şuşa şəhəri 2020-ci ildə Prezident İlham Əliyevin rəhbərliyi, müzəffər Azərbaycan Ordusunun şücaəti nəticəsində işğaldan azad olunmuşdur.
A.Rüstəmova vurğulayıb ki, “Şuşa İli” ilə bağlı mərkəzimizdə tədbirin keçirilməsində əsas məqsəd şagirdlərin vətənpərvərlik ruhunda tərbiyəsi işinin davamlı təşkilinə nail olmaq, gənc nəslin tariximizə dair biliklərini möhkəmləndirmək, Azərbaycanın ərazi bütövlüyü uğrunda şücaət göstərərək şəhidlik zirvəsinə ucalmış qəhrəmanlarımızı şagirdlər arasında tanıtmaq və onların xatirəsini yad etməkdən ibarətdir.
Çıxışlardan sonra Mərkəzin şagirdlərinin rəsm və əl işlərindən ibarət sərgisinə baxış keçirilib.
Tədbir çərçivəsində istedalı şagirdlər Qarabağın, o cümlədən Şuşa şəhərinin zəngin tarixindən, mədəni irsindən, işğal dövründə məruz qaldığı dağıntılardan söz açıb, şuşalıların yaşadıqları çətinliklər, Vətən həsrəti səhnəciklərlə, şeirlərlə xatırlanıb.
Ölkəmizi, o cümlədən Şuşanı vəsf edən mahnıların, mədəniyyət beşiyimizin yetişdirdiyi incəsənət xadimlərinin əsərlərinin ifa edildiyi tədbir maraqlı və yaddaqalan olub.
Tədbirdə “Arşın mal alan” operettasından “Qızların xoru” səhnəsi nümayiş etdirilib.
Sonda istedalı şagirdlərin ifasında “Əziz Şuşa” mahnısı ifa edilib .
