Avqustun 24-də Azərbaycan Prezidentinin 2011-ci il 27 dekabr tarixli Sərəncamı ilə təsdiq edilmiş "Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”na əsasən aşağı seçki komissiyaları üzvlərinin maarifləndirilməsi məqsədilə bütün respublikanı əhatə edən irimiqyaslı layihənin ikinci mərhələsi çərçivəsində
45 saylı Abseron seçki dairəsi dairə seçki komissiyasında aşağı seçki komissiyalarının katibləri, üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslara start verilib.
3 gün davam edəcək kurslar cari ilin noyabrında Milli Məclisə keçiriləcək növbəti seçkilərlə əlaqədar aşağı seçki komissiyaları üzvlərinin peşə hazırlığının daha da təkmilləşdirilməsi məqsədi daşıyır. Kursun birinci günündə iştirakçılara seçki prosesində icra olunacaq müxtəlif prosedurlarla bağlı məşğələlər keçirilib.
Rayon icra hakimiyyətinin I müavini İradə xanım Gülməmmədova “Seçici siyahıları ilə işin aparılması, seçkiqabağı təşviqatın aparılmasına şərait yaradılması, bildirişlərin seçicilərə çatdırılması və sair bu kimi istiqamətlərdə yerli icra və bələdiyyə strukturlarının rolu və onların seçki komissiyaları ilə səmərəli qarşılıqlı əlaqələrinin təşkili”, MSK-nın nümayəndələri-Ramiz İbrahimov və Tamam Cəfərova “Seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüquqlarının qorunması mexanizmləri”, 45 saylı Abşeron seçki dairəsi dairə seçki komissiyasının sədri Dilşad Abbasova “Seçici siyahıları ilə iş qaydası” mövzusunda məruzə edib. Məşğələdə aşağı seçki komissiyalarının üzvləri seçki prosesi ilə bağlı ətraflı məlumatlandırılıb və onları maraqlandıran suallar cavablandırılıb. 45 saylı Abşeron seçki dairəsində 36 məntəqə var. Milli Məclisə keçiriləcək seçkilərinin yüksək səviyyədə keçirilməsi üçün bütün məntəqələrdə zəruri tədbirlər görülüb
Baş redaktor: Şamo Əliyev
