Ölkəmizdə ilk elektromobil maşın hazırlanıb
Müxtəlif sahələrdə tətbiqi əhəmiyyəti olan araşdırma işlərinə xüsusi önəm verən Qafqaz Universiteti müəllim və tələbələrinin, eləcə də kampüsdə qurulmuş "Mexanika Mühəndisliyi" laboratoriyalarının potensialından istifadə edərək "EQUE" layihəsinin həyata keçirilməsini dəstəkləyib. Belə ki, EQUE layihəsi Qafqaz universitetinin maliyyə dəstəyi ilə, univeristet müəllim və tələbələri tərəfindən icra olunan layihədir. Layihə çərçivəsində mühəndisliyin mexanika, kompüter və kimya bölümlərindən 24 tələbə 13 müxtəlif komanda şəklində fəaliyyət göstərmişdir. Layihə əsasında elektrik və günəş enerjisi ilə işləyən və özünəməxsus şəkildə dizayn olunmuş 2 maşın hazırlanmışdır.
Layihənin adı EQUE- Electromobile of Qafqaz University Engineers ingiliscədən tərcümədə “Qafqaz Universiteti mühəndislərinin elektrik maşını” mənasını verir. İtalyancadan tərcümədə isə “eque” sözünün mənası “ədalət” deməkdir ki, bu da layihəhin hədəfini simvolizə edir. Layihənin məqsədi müasir texnologiyanın üstünlüklərindən istifadə edərək təbiətdən daha az xammal almaq hesabına ekologiyaya səmərəli olan və insanın enerji istehlakını minimuma endirən nəqliyyat vasitələrini təqdim etməkdir. Bu təqdimatla insanların diqqətini daha az enerji istehlakına yönəldən gənc mühəndislər məhdud enerji resurslarının cəmiyyətdə ədalətli şəkildə bölünməsi prinsipi üzərində dayanmaqla, alternativ enerjinin tətbiqini də ön plana çəkmişlər.
Qeyd edək ki, maşının hissələrinin hazırlanması üçün universitetin mexanika laborotoriyasındakı avadanlıqlardan istifadə edilib . Avtomobilin hissələrinin bir hissəsi alınsa da əksəriyyəti laborotoriyamızda tələbələrimiz tərəfindən hazırlanıb.