Xalq şairi, tanınmış dramaturq, ədəbiyyatşünas və ictimai xadim Bəxtiyar Vahabzadənin 90 illik yubileyinin keçirilməsi haqqında Azərbaycan Respublikası Prezidenti İlham Əliyevin 14 yanvar 2015-ci il tarixli Sərəncamına əsasən “Bəxtiyar Vahabzadə yaradıcılığının səciyyəvi xüsusiyyətləri” mövzusunda açıq dərs düzənlənib. Xırdalan şəhərində yerləşən Heydər Əliyev Mərkəzində baş tutan tədbirdə şagirdlər, Abşeron rayon ictimaiyyətinin nümayəndələri və valideynlər iştirak edib.
Şagirdlər əvvəlcə Ulu Öndərin abidəsini ziyarət edərək, önünə tər çiçəklər qoyub, Heydər Əliyev Mərkəzində dahi liderin keçdiyi şərəfli həyat yolunu, Azərbaycana rəhbərliyinin hər iki dövrünü, Abşeron rayonuna səfərlərini əks etdirən fotoşəkillərlə, böyük şəxsiyyət haqqında yazılmış kitablarla, qəzet, jurnal və rəsmi sənədlərlə tanış olublar.
Xırdalan şəhər 9 nömrəli tam orta məktəbin Ana dili və ədəbiyyatı üzrə fənn müəlliməsi İradə Talıblı açıq dərsdə B.Vahabzadə yaradıcılığına bir daha nəzər salaraq müxtəlif əsərlərindən sitatlar, nümunələr gətirib. O, B.Vahabzadə haqqında ümumi məlumat verərək bildirib ki, şair həm Azərbaycanın ədəbiyyatında, həm də ictimai-siyasi həyatında mühüm rol oynamış görkəmli simalarından biridir. Milli-mənəvi dəyərlərə hörmət və ana dilinin saflığının qorunması istiqamətində B.Vahabzadənin fəaliyyətini qeyd edən İ.Talıblı şairin öz dövrünün əsgəri olduğunu, vətəni, dövləti üçün çalışdığını bildirib. B.Vahabzadənin yaradıcılığında toxunduğu mövzulardan söz açan müəllimə dahi şairin poeziyasında Cənub mövzusunun qırmızı xətt kimi keçdiyini söyləyib.
“Açıq dərs”də Təhsil şöbəsinin müdir müavini Pərviz Əhmədov, Xırdalan şəhər 9 nömrəli tam orta məktəbin direktoru Həcər İbrahimova, Xırdalan şəhər 2 nömrəli tam orta məktəbin direktoru Ədalət Camalova, Saray qəsəbəsi 3 nömrəli tam orta məktəbin direktoru Təyyübə Hüseyinova və digər çıxışçılar B.Vahaabzadənin həyat və yaradıcılığından söz açaraq onun əsərlərinin şagirdlərdə və gənclərdə milli mənəvi dəyərlərin, milli təəssübkeşlik hissinin formalaşmasında, inkişafında mühüm rol oynadığını qeyd ediblər.
Daha sonra tədbir şagirdlərin ifasında şairin şeirlərinin söylənilməsi, onun sözlərinə bəstələnən mahnıların ifası ilə davam etdirilib.
