Xırdalan şəhərində məktəblilərə ödənişsiz riyaziyyat kurslarının keçirilməsi üçün "Riyaziyyat evi" yaradılıb. Abşeron Rayon İcra Hakimiyyətinin təşəbbüsü, Qafqaz Universitetinin və rayon təhsil şöbəsinin birgə təşkilatçılığı ilə ərsəyə gələn mərkəzin açılış mərasimi keçirilib. Rəmzi açılışı bildirəm qırmızı lenti Abşeron Rayon İcra Hakimiyyətinin başçısı İradə Gülməmmədova və Qafqaz Universitetinin rektoru Ahmet Sanic kəsib.
Bundan sonra məlumat verilib ki, təcrübəli müəllimlər tərəfindən keçiriləcək kurslar 7-ci və 8-ci sinif şagirdləri, həmçinin olimpiadaya hazırlaşanlar üçün nəzərdə tutulub. Burada həndəsə və riyaziyyat fənlərindən çətin olan teoremlərin sagirdlər üçün izah olunması işi həyata keçiriləcək. Şahmat Məktəbinin binasında təsis edilən ödənişsiz kursların keçirilməsinin başlıca səbəblərindən biri isə şagirdlərin nəzərdə tutulmuş fənlərə marağını artırmaqdır.
Diqqətə çatdırılıb ki, riyaziyyat olimpiadasına hazırlıq dərsləri Qafqaz Universitetinin tələbələri tərəfindən aparılacaq. Ümumiyyətlə, bu mərkəzin açılması Abşeron rayon məktəblərində oxuyan şagirdlərin elmi biliklərinin inkişafına böyük təkan verəcək. Belə ki, hər məktəbdən bir və ya iki sinif "Riyaziyyat evi"nə gələrək ödənişsiz kurslarla maraqlanıb stendlərlə tanış ola biləcəklər.
İcra başçısına bildirilib ki, Qafqaz Universitetinin tələbələri Abşeron rayonunun bütün orta məktəblərinə baş çəkməklə şagirdlər arasında imtahanlar teşkil edəcəklər. Şagirdlərin kursa cəlb olunmasında Əsas Seçim isə Qafqaz Universiteti tərəfindən 6-cı siniflərdən başlayaraq heyata keçiriləcək.
Abşeron Rayon İcra Hakimiyyətinin başçısı İradə Gülməmmədova Riyaziyyat Evində şagirdlər üçün yaradılan şəraitdən razı qaldığını bildirib və uğurlar arzulayıb.
