Bu gün Abşeronda Dövlət Təhlükəsizliyi Xidmətinin əməkdaşlarının peşə bayramı qeyd edilib. Əvvəlcə DTX Abşeron rayon şöbəsinin əməkdaşları Heydər Əliyev parkında Ulu Öndərin abidəsini ziyarət edib, önünə gül dəstələri qoyublar. Daha sonra Heydər Əliyev Mərkəzində ümummilli liderin həyat və fəaliyyətini əks etdirən videomateriallar, fotoşəkillər, interaktiv lövhələrə baxış olub.
Bundan sonra DTX Abşeron rayon şöbəsinin rəisi Rauf Məmmədov təhlükəsizlik orqanlarının keçdiyi 97 illik şərəfli yoldan ətraflı danışıb. O, bildirib ki, 1919-cu il martın 28-də Azərbaycan Demokratik Respublikası Hərbi Nazirliyinin Baş Qərargahı nəzdində kəşfiyyat və əks-kəşfiyyat bölməsinin yaradılması ilə təməli qoyulan təhlükəsizlik orqanları şərəfli inkişaf yolu keçib. Dövlət müstəqilliyinə, ərazi bütövlüyünə qarşı yönəldilmiş terror-təxribat və kəşfiyyat-pozuculuq cəhdlərinin qarşısının qətiyyətlə alındığını, bu gün regionun lider dövləti olan müstəqil respublikamızın mühüm dövlət strukturuna çevrildiyini qeyd edən R.Məmmədov əlavə edib ki, keçmiş kommunist rejiminin ilk dövrlərində cəza maşını funksiyasını yerinə yetirən komitədə milli ruhlu, vətən qeyrətli oğulların da çalışdığına diqqət çəkib. O, 1956-1965-ci illərdə ulu öndər Heydər Əliyevin Dövlət Təhlükəsizliyi Komitəsində əvvəlcə əks-kəşfiyyata, 1967-ci ildən isə Komitəyə rəhbərliyi zamanı həmin xidmət orqanlarının keyfiyyətcə yeni mərhələyə qədəm qoyduğunu, milli dövlətçiliyi və maraqları mühafizə edən struktura çevrildiyini, burada çalışan milli kadrların sayının qısa müddətdə əhəmiyyətli dərəcədə artırıldığını xüsusi qeyd edib.
Abşeron Rayon İcra Hakimiyyətinin başçısı İradə Gülməmmədova DTX əməkdaşlarını peşə günləri münasibəti ilə təbrik edərək 97 il bundan əvvəl yaradılmış təhlükəsizlik orqanlarının fəaliyyətindən, Ulu Öndər Heydər Əliyevin Azərbaycan Respublikası Dövlət Təhlükəsizlik Komitəsinə rəhbər təyin ediləndən sonra ümummilli liderin göstərdiyi əvəzsiz xidmətlərindən, 1991-ci ildə MTN-nin yaradılmasından sonra milli maraqlara söykənərək ictimai təhlükəsizlik qaydalarının daha da möhkəmləndirilməsindən, dövlət başçısı İlham Əliyevin diqqət və qayğısı sayəsində xüsusi xidmət orqanlarının fəaliyyətlərinin yüksək səviyyədə təşkil olunmasından, onun əməkdaşlarının peşəkarlığından danışıb.
Sonda Abşeron Rayon məhkəməsinin sədri Əlşir Səmədov, rayon prokuroru Rahib Seyidov və başqaları çıxış edərək təbriklərini söyləyiblər.
