Bu gün millət vəkili Zeynəb Xanlarova Abşeron rayonunda bir qrup seçiciləri ilə görüşüb. Vətandaşları narahat edən məsələlərlə dərindən maraqlanan millət vəkili onları maraqlandıran suallara da cavab verib.
Seçicilərdən Ofelya Əkbərova, Xuraman Behbudova, Rəhilə Əmiraslanova, Şəmistan Rəhimov, Namiq Cəfərov və digərləri rayon ərazisində böyük abadlıq işlərinin görüldüyünü, bir çox sosial yonümlü problemlərin tam şəkildə aradan qaldırıldığını qeyd ediblər. Bununla yanaşı Qobu, Aşağı Güzdək və eləcə də digər kənd və qəsəbələrinin bəzilərinə verilən təbii qazın təzyiqinin çox aşağı olmasını, rayon ərazisində su-konalizasiya xəttlərinin çəkilməsinə böyük ehtiyacın olduğunu qeyd ediblər. Seçicilər Abşeron rayonu ilə Qaradağ rayonunu birləşdirən Güzdək-Buta yolunun Qaradağ rayonu ərazisinə düşən hissəsinin təmir edilməsində, o cümlədən Masazır kəndində bələdiyyə tərəfindən Avropa standartlarına uyğun inşa edilmiş uşaq bağçasının fəaliyyətə başlaması üçün köməklik göstərilməsini xahiş ediblər.
Z.Xanlarova seçicilər tərəfindən bildirilən problemlərlə bağlı aidiyyatı təşkilatlar qarşısında məsələ qaldıracağını deyərək onların həlli istiqamətində çalışacağını söyləyib.
Abşeron rayonunda çox böyük işlərin görüldüyünü, Xırdalan şəhərinin və eləcə də kənd və qəsəbələrin günü-gündən inkişaf etdiyini qeyd edən millət vəkili rayon əhalisinin surətlə atması səbəbindən şəkildə bəzi sosial məsələlərin ortaya çıxması təbii haldır. Dövlətin bu problemləri qarşılamaq iqtidarında olduğunu, yaxın zamanlarda aradan qaldırılacağını deyən Z.Xanlarova hər bir insan üçün xalqına, vətəninə xidmət etməyin ən böyük amal olduğunu bildirib.
