Bu gün Abşeron rayonu Perəkəşkül qəsəbəsində yerləşən Müdafiə Nazirliyinin N saylı hərbi hissəsində Abşeron Rayon İcra Hakimiyyətinin dəstəyi ilə əsgərlər üçün Novruz şənliyi təşkil edilib.
Tədbirdə Abşeron Rayon İcra Hakimiyyətinin başçısı xanım İradə Gülməmmədova, rayonun hüquq mühafizə orqanlarının rəhbərləri, rayonun fəal gəncləri və hərbi hissənin şəxsi heyəti iştirak edib.
Şənlikdə Rayon İcra Hakimiyyəti tərəfindən gətirilən bayram sovqatı əsgərlərə təqdim edilib.
Hərbi hissənin komandanlığı Abşeron Rayon İcra Hakimiyyəti rəhbərliyinin bayram gününü əsgərlərlə birlikdə keçirməsini yüksək qiymətləndirərək ölkədə orduya böyük diqqət və qayğının göstərildiyini, əsgərlərimizin işğal altında olan torpaqları azad etməyə hər zaman hazır olduqlarını bildirib.
Abşeron Rayon İcra Hakimiyyətinin başçısı İradə Gülməmmədova hərbi hissənin əsgər və zabit heyətini bayram münasibəti ilə təbrik edərək, növbəti bayramların işğal altında olan torpaqlarımızda keçiriləcəyinə əminliyini ifadə edib. İ Gülməmmədova lazım gələrsə Abşeronluların da silaha sarılaraq hərbçilərimizin yanında olacağını söyləyib.
Rayon rəhbəri hamilik etdikləri hərbi hissənin şəxsi heyətini Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin ordumuz üçün yaratdığı yüksək şərait müqabilində daha yaxşı xidmət etməyə çağırıb.
Sonra əsgər yeməkxanasına baş çəkilib və xanım İradə Gülməmmədova əsgər yeməyindən dadıb.
Tədbir incəsənət nümayəndələrinin konserti proqramı ilə davam etdirilib.
Şamo Əliyev